IĦEJJI L-KARTI TAD-DIVORZJU GĦAR-RENJU UNIT

Il-Franċiż Michel Barnier, li serva bħala Kummissarju tas-suq ħieles u s-servizzi finanzjarji bejn l-2010 u l-2014, ingħata l-kariga ta’ ‘negozjatur ewlieni inkarigat biex iħejji u jwettaq in-negozjati mar-Renju Unit taħt Artiklu 50’.

Barnier inħatar mill-President tal-Kummissjoni Jean-Claude Juncker u se jirrapporta dirett lilu. Se jkollu l-aħjar esperti tal-Kummissjoni għad-dispożizzjoni tiegħu. Grupp ta’ Diretturi Ġenerali se jkunu qed jagħtuh il-pariri. Barnier ukoll se jkun fil-pożizzjoni ta’ Direttur Ġenerali u se jieħu postu fl-1 ta’ Ottubru 2016.

Barnier se jwettaq id-divorzju bejn ir-Renju Unit u l-Unjoni Ewropea wara li dan il-pajjiż ikun skatta Artiklu 50. Iżda qabel, se jkun qed jagħmel xogħol preparatorju. Ġaladarba jiskatta Artiklu 50, ikun hu li jagħmel kuntatt mal-awtoritajiet Ingliżi, l-istati membri u l-persuni kollha li se jieħdu sehem fid-diskussjonijiet.

Il-Kunsill tal-UE fforma ‘Task force’ mmexxija mill-Belġjan Didier Seeuws. Din se tmexxi l-aspetti politiċi tan-negozjati mal-Brittanniċi filwaqt li l-Kummissjoni se tkun responsabbli għall-aspetti legali.