AKTAR GASS RUSSU FL-EWROPA

Il-Kumpanija tal-Gass Russa Gazprom esportat numru rekord ta’ gass lejn l-Ewropa u t-Turkija fl-2016, żjieda ta’ 12.5% fuq is-sena ta’ qabel. Dan minħabba l-kesħa li ħakmet l-Ewropa fl-aħħar xhur tal-2016, il-waqgħa fil-prezz taż-żejt, u t-tnaqqis fil-produzzjoni Ewropea tal-gass. Gazprom stmat li fl-2016 ipprovdiet terz tal-konsum tal-kontinent Ewropew. Il-Kumpanija saħqet li l-UE għandha bżonn il-gass Russu. L-istrateġija tal-UE hija li tiddiversifika biex tnaqqas id-dipendenza tagħha u tal-pajjiżi tal-Lvant tal-Ewropa mill-gass li ġej mir-Russja.

Il-gass Russu qed jintbagħat lejn il-Ġermanja minn pajpijiet taħt il-baħar Baltiku. Minn hemm il-gass jgħaddi lejn il-lvant tal-Ġermanja mal-fruntiera tar-Repubblika Ċeka. Dan ikun ta’ detriment għall-esportazzjoni tal-gass Russu li kien jgħaddi minn ġol-Ukraina.

Il-Kummissarju għall-Enerġija u Viċi-President tal-Kummissjoni Ewropea Maros Sefcovic qal li qiegħed fi djalogu kontinwu mal-Ukraina u r-Russja biex il-gass mir-Russja jerġa’ jibda jgħaddi wkoll mill-Ukraina lejn l-Ewropa.