BALLU RJALI FI VJENNA

Vjenna se tkun l-isbaħ belt Ewropea biex tiċċelebra l-Ewwel tas-Sena fid-dinja tal-aristokrazija. Dik li mitt sena ilu kienet iċ-ċentru tal-Imperu Awstrijakk, tospita l-ballu rjali fil-Palazz tal-Hapsburgi waqt li fi nħawi oħra tal-belt ikunu għaddejjin ċelebrazzjonijiet fil-pjazez ewlenin. Is-swieq tal-Milied qed jiġbdu eluf ta’ nies biex il-qofol jintlaħaq fil-festi ta’ Lejlet l-Ewwel tas-Sena. Dawn jibdew mis-sagħtejn ta’ wara nofsinhar u jibqgħu sejrin sas-sigħat bikrin tal-Ewwel tas-Sena. Inbid jagħli se jkun ix-xorb favorit għall-eluf li se jimlew il-pjazez u t-toroq ta’ Vjenna. Dak in-nhar tal-Ewwel tas-Sena eluf ta’ nies mistennija jinġabru ħdejn is-City Hall ta’ Vjenna biex isegwu fuq screen kbir il-Kunċert famuż tal-Ewwel tas-Sena.