DIL-ĠIMGĦA S-SUMMIT EWROPEW

Il-kapijiet tal-istati tal-UE fis-summit Ewropew ta’ dan ix-xahar fi Brussell se jiddiskutu l-kwistjonijiet l-aktar urġenti. Fost oħrajn is-summit ta’ din il-ġimgħa se jiffoka dwar l-immigrazzjoni, is-sigurta` u d-difiża, kif ukoll l-ekonomija u l-affarijiet finanzjarji. Il-mexxejja tal-pajjiżi se jiddiskutu dwar iż-żona ewro u dwar il-Brexit.

Rigward l-ekonomija l-mexxejja mistennija jiddiskutu suġġetti bħat-tassazzjoni, l-innovazzjoni u s-settur diġitali u l-baġit tal-UE għas-sebgħa snin li jmiss.

Għal qasam tas-sigurta` u d-difiża l-mexxejja se jiddiskutu l-kooperazzjoni bejn l-UE u n-NATO biex iħejju t-triq għas-summit tan-NATO ta’ Lulju li ġej. Se jiddiskutu wkoll dwar il-fond għad-difiża u l-politika f’dan il-qasam.

Mhux mistenni li jintlaħaq qbil fil-qasam tal-immigrazzjoni fejn id-diskussjoni se tkun qed timraħ dwar ir-riforma fil-politika komuni Ewropea f’dan il-qasam.