IL-PRESIDENZA AWSTRIJAKA : ‘EWROPA LI TIPPROTEĠI’

Is-sigurta` u l-immigrazzjoni, il-kompetittivita` ekonomika u l-istabbilita` fil-Balkani huma tliet prijoritajiet tal-Presidenza Awstrijaka tal-Kunsill tal-UE li tibda fl-1 ta’ Lulju.

Dan ħabbru Nikolaus Marschik, l-Ambaxxatur Awstrijak għall-UE.

“Nemmnu u se naħdmu għal ‘Ewropa li tipproteġi’. Irridu nibnu dar b’saħħitha li tilqa’ għall-isfidi komuni, mill-immigrazzjoni għaż-żona ewro”, qal Marschik.

Dwar l-immigrazzjoni, l-Ambaxxatur qal li hemm kunsens bejn l-istati membri li l-għassa fuq il-fruntieri Ewropej u fuq il-fruntieri tal-baħar għandha tkun organizzata aħjar. Ħidma mal-pajjiżi tal-oriġini tal-immigranti se tkun intensifikata biex ikunu megħjuna biss dawk li jeħtieġu ażil u jkunu skoraġġati dawk li jipperikolaw ħajjithom biex jaqsmu lejn l-Ewropa.

Vjenna diġa` ppjanat laqgħa tal-Kapijiet tal-UE dwar l-immigrazzjoni f’Salzburg fl-20 ta’ Settembru.

Dwar is-sigurta` ekonomika u l-kompetittivita` l-Awstrija se tirrakkomanda politika ta’ appoġġ dwar trasformazzjoni diġitali, sorsi ta’ tkabbir u impjiegi ġodda u l-ħarsien tal-privatezza f’dan il-qasam. L-Awstrija hija favur li jkunu ntaxxati kumpaniji diġitali fl-Ewropa.

L-Awstrija tgħid li r-reġjun tal-pajjiżi ġirien tal-Balkani huwa tal-Ewropa u fil-kriżi tal-immigrazzjoni tal-2015 ir-reġjun kien ‘sieħeb ta’ min jistrieħ fuqu’.

Marschik identifika tliet punti dwar in-negozjati tal-Budget ġdid Ewropew wara 2020: id-daqs tal-Budget, l-istruttura u d-dati meta jsiru n-negozjati.

Sebastian Kurz, Kanċillier Awstrijak se jindirizza l-Parlament Ewropew fis-sessjoni Plenarja ta’ Lulju.