FAVUR IL-PAGA MINIMA GĦALL-EWROPA KOLLHA

Kważi 40 sena wara li Malta lleġislat dwar il-paga minima, il-Parlament Ewropew irrakkomanda lill-istati membri paga minima minn tal-inqas 60% tal-paga medja tal-pajjiż biex il-livell ta’ għixien ikompli jitla’ ’l fuq. Din ir-rakkomandazzjoni, li għaddiet b’458 vot favur, 199 kontra u 34 astenzjoni, ma torbotx lill-istati membri.

Il-vot sar bit-tama li fl-UE min iħaddem ma jkunx jista’ jibqa’ jħallas bil-prekarjat. B’hekk jitnaqqsu l-illegalitajiet u l-prattiċi ħżiena.

Ir-riżoluzzjoni teħtieġ azzjoni fi tliet oqsma – tisħiħ u moniteraġġ mill-istati membri u koordinament bejniethom; ħidma biex jitjiebu r-regoli biex ikun żgurat li l-liġijiet soċjali relatati mal-impjiegi jkunu rrispettati fuq bażi nazzjonali u fuq bażi Ewropea; il-promozzjoni tal-konverġenza soċjali. Il-Parlament Ewropew jixtieq imur lil hinn minn hekk. L-aktar oqsma li fih isiru abbużi fil-pagi tal-ħaddiema huma fl-oqsma tal-kostruzzjoni u t-trasport. Għalhekk il-PE jixtieq iniedi aġenzija Ewropea tat-trasport. Jixtieq ukoll joħloq lista ta’ kumpaniji li ma jimxux mar-regoli biex ma jkunx jistħoqqilhom jieħdu kuntratti.