GĦAJNUNA LIL AFRIKA

Franza u tliet pajjiżi tal-Benelux – Belġju, Lussemburgu u Olanda ħabbru pjan biex joffru fondi tal-UE lil pajjiżi Afrikani jekk jirċievu għajnuna minngħandhom biex titwaqqaf il-mewġa tal-immigranti fl-Ewropa.

L-erba’ pajjiżi qablu dwar proposti li issa se jiddiskutu f’laqgħa mal-mexxejja tal-UE kollha f’Salzburg, l-Awstrija aktar tard f’dan ix-xahar.

F’din l-aħħar sena l-UE żiedet l-appoġġ lejn il-pajjiżi Afrikani permezz ta’ għajnuna u investimenti bl-għan li jonqsu l-persuni li jitilqu darhom biex ifittxu ħajja aħjar fl-Ewropa.

“L-Unjoni Ewropea trid twettaq forma ta’ Pjan Marshall għal Afrika b’mod konkret u flimkien mal-pajjiżi Afrikani”, qal il-Prim Ministru Belġjan Charles Michel.

L-erba’ mexxejja saħqu dwar aktar għajnuna lil pajjiżi li fihom jirfsu l-ewwel l-immigranti – bħal Italja u Spanja iżda saħqu wkoll li l-immigranti li jinżlu għandhom huma responsabbilta` tagħhom.

Il-Gvern Taljan qed jgħid li l-Italja qed iġġorr piż kbir u inġust u l-UE għandha tniżżel l-immigranti fil-portijiet kollha Ewropej b’rotazzjoni.

L-Italja mhix tilqa’ l-immigranti kollha salvati fuq il-baħar biex tisforza pajjiżi oħra jeħduhom. Ix-xahar li għadda l-Italja heddet li tiblokka l-baġit Ewropew fuq din il-kwistjoni.

Macron qal li l-pajjiżi li fuqhom jirfsu l-immigranti “għandhom responsabbilta` li ma jistgħux jeħilsu minnha, iżda għandu jkun hemm solidarjeta` finanzjarja.”