MILIZJI KONTRA L-IMMIGRANTI FL-EWROPA ĊENTRALI

L-Awtoritajiet Ċeki u Sloveni jinsabu mħassba dwar milizji armati li qed jgħassu għall-immigranti. Rapport tas-servizzi sigrieti Ċeki jitkellem dwar il-grupp Gwardja Nazzjonali.

“Parti minn dan il-grupp qed ikun armat. Minħabba li l-membri tiegħu huma xenofobiċi u razzisti jistgħu jkunu ta’ riskju,” qal ir-rapport.

Il-grupp għandu 2, 500 membru mqassmin f’90 fergħa differenti. Dawn jgħassu t-toroq ta’ villaġġi żgħar Ċeki biex isibu immigranti irregolari. Huwa maħsub li għandhom konnessjoni mal-pulizija lokali u l-appoġġ tal-partit tax-xellug estrem Demokrazija Nazzjonali.

Il-Ministru tal-Affarijiet Barranin Ċek qal li gruppi ta’ dan it-tip iġorru r-riskju li jwettqu protesti vjolenti, bħal dawk li ġraw fil-Ġermanja f’Chemnitz f’Awwissu.

“In-nies li jemmnu li la l-istat u l-anqas l-Ewropa ma tista’ ssib rkaptu tal-kriżi tal-immigrazzjoni, jieħdu l-affarijiet f’idejhom biex jipproteġu lil familji u l-propjeta` tagħhom.” qal Andor Sandor, l-ex kap tal-ispjunaġġ militari Ċek.

Ftit tal-ġranet ilu fis-Slovenja, politikant tal-lemin estrem Andrej Sisko, fuq facebook tella’ ritratt tiegħu ma’ sebgħin raġel mgħammda u armati b’machine guns. Il-grupp ‘Stajerska Guard’ deher qed jieħu ġurament biex jiżgura l-ordni pubbliku fil-pajjiż. Il-grupp diġa` jgħodd  mijiet ta’ nies.

Il-President Sloven Borut Pahor qal li fis-Slovenja l-ebda persuni mhux awtorizzati ma jistgħu jieħdu ħsieb is-sigurta` tal-pajjiż u l-fruntieri tagħha.

Ir-Repubblika Ċeka ħadet biss 12-il immigrant mill-Ġreċja u l-Italja taħt l-iskema tal-Kummissjoni Ewropea għat-tqassim ġust tal-immigranti. Tat l-ażil lil 145 persuna. Is-Slovenja tat l-ażil lil 152 persuna is-sena l-oħra. Is-Slovenja ibbojkotjat l-iskema tal-Kummissjoni, flimkien mal-Ungerija u l-Polonja.

Il-Prim Ministru Ċek Andrej Babis wiegħed li se jieħu t-triq ta’ kontra l-immigrazzjoni flimkien mal-Ungerija u l-Italja.