GĦAWDEX JEĦTIEĠ TRATTAMENT SPEĊJALI

Riżoluzzjoni fil-Parlament Ewropew dwar l-insularita` ta’ reġjuni gżejjer fl-Unjoni Ewropea ġiet emendata mill-Membru Parlamentari Ewropew Alfred Sant biex tindirizza aħjar iċ-ċirkostanzi speċjali ta’ Għawdex li jeħtieġ trattament speċjali. Din ir-riżoluzzjoni tinkludi  l-problemi ta’ gżejjer bħal Għawdex, mingħajr kapital nazzjonali, marbuta ma’ stati gżejjer oħra. “F’ċirkostanzi bħal dawn, minħabba l-insularita` doppja, il-popolazzjoni tibqa’ tonqos anki waqt żmien ta’ tkabbir ekonomiku. Miżuri kompletament kwantitattivi mhux biżżejjed biex jindirizzaw il-problema. Qed nirreferi għal gżira ta’ Għawdex. Anki issa, bit-tkabbir ekonomiku li jaqbeż l-4% fis-sena għal gżira ta’ Malta, iż-żgħażagħ Għawdxin jgħidu li ma għandhomx futur fuq gżirithom.” qal Alfred Sant lill-Parlament Ewropew.

Dr Sant saħaq li t-tnaqqis fil-popolazzjoni se jsir irriversibbli fi gżejjer bħal Għawdex jekk ma jkunx permess li jittieħdu miżuri eċċezzjonali li mhux neċessarjament jaqblu mar-regoli u l-politika tal-Unjoni Ewropea. “Dawn il-miżuri għandhom jinvolvu intervent ekonomiku mis-settur pubbliku bis-sħubija mal-privat biex jinħolqu intrapriżi ġodda u impjiegi ġodda speċjalment għaż-żgħażagħ. Is-settur diġitali, is-servizzi finanzjarji, intrapriżi artiġjanali u agrarji u s-servizzi tas-saħħa kollha jistgħu jkunu fil-mira biex permezz tagħhom jitwaqqaf l-esodu tal-popolazzjoni. Dawn ikunu jistgħu joffru l-imjiegi kemm meta l-ekonomija nazzjonali tkun sejra tajjeb u kemm meta din tkun qed tbatti.” saħaq Dr. Sant.

Ir-riżoluzzjoni, approvata mill-Parlament Ewropew, tisħaq li reġjuni gżejjer għandhom karatteristiċi simili u speċifiċi u karatteristiċi oħra li jiddistingwuhom mir-reġjuni ċentrali. Dawn jistgħu jissarrfu f’ċerti impedimenti permanenti li jeħtieġu attenzjoni partikolari. Ir-riżoluzzjoni tirreferi għall-fatt li l-istati gżejjer tal-UE huma wkoll reġjuni li jinsabu fil-periferija tal-Ewropa u huma parti mill-fruntieri esterni tal-UE. Għalhekk huma partikolarment vulnerabbli għall-isfidi li l-Ewropa qed taffaċċja bħalissa. Tisħaq li turiżmu intensiv ikkonċentrat tul ċertu perijodi tas-sena u mhux ppjanati b’mod effettiv jista’ jfisser riskji għall-iżvilupp ambjentali u sostenibbli tal-gżejjer. Is-sejħa hija għall-konnettivita` aħjar bil-baħar, aċċess aħjar għall-portijiet u titjieb fis-servizzi tat-trasport bl-ajru. Il-Kummissjoni Ewropea qed tintalab titlaq bi studju jew analiżi dettaljata tal-ispejjeż żejda li jakkumulaw ir-reġjuni gżejjer, f’termini ta’ sistemi tat-trasport għan-nies u għall-prodotti, ħażna tal-enerġija u aċċess għas-swieq, b’mod partikolari għall-intrapriżi żgħar u medji. Aktar minn hekk ir-riżoluzzjoni tisħaq ukoll, li l-lat diġitali huwa vitali biex jikkumpensa għall-impedimenti fil-konnettivita` ta’ reġjuni gżejjer.