KEMM TISWA T-TNEĦĦIJA TAX-XENGEN?

Jekk iż-żona Xengen tispiċċa u l-pajjiżi li qegħdin fiha jerġgħu jdaħħlu l-kontrolli, flimkien jibdew jonfqu aktar minn €100 biljun. Studju mill-Kabinett tal-Prim Ministru Franċiż janalizza l-ispejjeż li jinħolqu jekk jispiċċa l-moviment ħieles tax-Xengen u jikkonsidra żewġ sitwazzjonijiet. L-ewwel sitwazzjoni tinvolvi kontrolli mnaqqsa għall-karozzi privati u ‘spotchecks’  fuq it-trakkijiet. Dawn inaqqsu l-veloċita` tat-traffiku. It-tieni sitwazzjoni tinvolvi kontrolli bir-reqqa fuq karozzi privati u kontroll sistematiku fuq it-trakkijiet. Dan iwassal għal ħafna aktar dewmien fuq il-fruntieri.

Skont l-istudju, l-ewwel sitwazzjoni tiswa lill-ekonomija Franċiża bejn €1 u €2 biljuni. Din iċ-ċifra ma tinkludix spejjeż addizzjonali biex jerġgħu jiddaħħlu l-kontrolli tad-dwana. Din is-sitwazzjoni żżid l-ispejjeż tat-trasport u tnaqqas lil ħaddiema li jaħdmu minn pajjiż għall-ieħor.

Il-kontrolli permanenti fuq il-fruntieri jwasslu biex jitnaqqas il-kummerċ bejn pajjiż u ieħor fiż-żona Xengen. Huwa stmat li dan it-tnaqqis ilaħħaq bejn 10% u 20%. Għal Franza dan ifisser telf ta’ €10 biljun jew tnaqqis ta’ 0.5% tal-PGD. Għall-pajjiżi l-oħra dan ifisser tnaqqis ta’ 0.8% tal-PGD, jew telf ta’ aktar minn €100 biljun. Dan jissarraf ukoll fi tnaqqis fl-investiment dirett u fl-influssi finanzjarji.

Il-Kummissjoni qalet li l-prezz għat-tneħħija tax-Xengen huwa għoli ħafna. Il-kontrolli fuq il-fruntieri kif imħaddma bħalissa jiswew €3 biljun jekk l-affarijiet jibqgħu kif inhuma.