JONQSU S-SIRJANI, JIŻDIEDU L-IRAQQINI

Mill-bidu tal-2016 ’l hawn diġa` waslu 55, 000 immigrant, medja ta’ 2, 000 persuna kuljum. F’dan il-perijodu mietu 244 persuna fil-baħar fir-rotta tagħhom lejn l-Ewropa.

Skont il-Frontex in-numru ta’ immigranti Sirjani qed jonqos filwaqt li l-immigranti ta’ oriġini Iraqqina qed jiżdied. L-immigranti ta’ oriġini Afgani jammontaw għal bejn kwart jew terz tat-total kollu tal-immigranti li qed jaslu fuq il-fruntiera Griega.

Bejn is-17 u t-18 ta’ Frar se jsir ‘summit’ Ewropew dwar l-immigrazzjoni. Lejlet il-laqgħa, fi Praga fil-15 ta’ Frar, ir-Repubblika Ċeka, l-Islovakkja, l-Ungerija u l-Polonja għandhom ‘mini-summit’ bejniethom biss. Dawn mistennija jitolbu lil UE għal aktar ħarsien bir-reqqa tal-fruntieri esterni tagħha u għal tnaqqas fl-influss tal-immigranti. Dawn l-erba’ pajjiżi huma fost l-aktar li ma jixtiqux jieħdu sehem fil-pjan ta’ rilokazzjoni tar-refuġjati.

Il-Prim Ministru tar-Repubblika Ċeka Sobotka hu tal-fehma li l-Greċja hija responsabbli għas-sitwazzjoni preżenti. Jemmen ukoll li hemm bżonn li ssir aktar pressjoni fuq it-Turkija.

Il-‘mini-summit’ ġie ppjanat wara li l-Ministri tal-Intern tal-pajjiżi talbu lill-Kummissjoni tħejji  bażi legali li tħalli lil sitt pajjiżi membri jibqgħu jagħmlu l-kontrolli fuq il-fruntieri tagħhom għal sentejn oħra. Din id-deċiżjoni hija theddida għaż-żona Xengen. Il-Prim Ministru tar-Repubblika Ċeka sejjaħ dan il-‘mini-summit’ bit-tama li jinstab pjan alternattiv.