IL-ĠERMANJA, L-ITALJA U FRANZA JRIDU PROTEZZJONI MILL-INVESTIMENT BARRANI

Il-Ġermanja, l-Italja u Franza jridu aktar protezzjoni f’setturi sensittivi f’pajjiżhom u li fihom qed jinvestu pajjiżi li mhumiex membri tal-UE. F’ittra indirizzata lil Kummissarju tal-Kummerċ Cecilia Malmstrom, il-Ministru tal-Ekonomija Ġermaniża Brigitte Zypries u l-Ministri tal-Ekonomija Franċiż u Taljan – Michel Sapin u Carlo Calenda talbu aktar protezzjoni f’setturi sensittivi b’detriment għall-investimenti ta’ pajjiżi terzi, speċjalment jekk dawn ma jirreċiprokawx u joffru aktar aċċessi fis-swieq tagħhom.

“Fl-aħħar snin, investituri mhux Ewropej, minħabba raġunijiet strateġiċi, ħadu ħafna kumpaniji Ewropej ta’ kompetenza teknoloġika. Fl-istess ħin, investituri Ewropej ma għandhomx l-istess drittijiet fil-pajjiżi rispettivi tagħhom daqs l-investituri li mhux Ewropej fil-kuntest tal-UE.” qalu t-tliet ministri.

“Aħna inkwetati minħabba n-nuqqas ta’ reċiprożita` u minħabba n-nuqqas ta’ għodda biex niġġieldu dan il-bejgħ tal-kompetenzi Ewropej.”

It-tliet pajjiżi qed jitolbu reċiprożita` biex jawtorizzaw investiment barrani fl-UE minn pajjiżi li l-aċċess għas-suq tagħhom huwa limitat.

Il-Kummissarju Malmstrom qalet li lesta għal djalogu. Il-Kummissjoni qalet li l-ideat tal-Ġermanja, Franza u l-Italja se jkunu diskussi imma kull inizjattiva fuq livell Ewropew trid tkun kompatibbli mat-trattati u mal-wegħdiet internazzjonali li l-Unjoni ntrabtet magħhom.