IS-SANZJONIJIET RUSSI ESTIŻI SA ĠUNJU 2018

Il-mexxejja tal-pajjiżi Ewropej reġgħu qablu biex jestendu s-sanzjonijiet fuq ir-Russja minħabba l-kriżi fil-Lvant tal-Ukraina, l-anniħilazzjoni tal-Krimea u n-nuqqas ta’ implimentazzjoni min-naħa Russa tal-ftehim ta’ Minsk. Is-sanzjonijiet, li jiskadu fl-aħħar ta’ Lulju, ġew estiżi mill-Kunsill tal-Affarijiet Barranin sat-23 ta’ Ġunju 2018. Daħlu fis-seħħ l-ewwel darba fl-Lulju tal-2014.

Il-miżuri ristrettivi jinkludu l-projbizzjoni ta’ oġġetti li joriġinaw mill-Krimea u Sevastopol fl-UE; jipprojbixxu investiment Ewropew f’dawn iż-żoni – jiġifieri kumpaniji Ewropej ma jistgħux jixtru proprjeta` fil-Krimea u jiffinanzjaw kumpaniji tal-lokal jew jissupplixxulhom xi servizz; fis-settur turistiku ‘cruise liners’ ma jistgħux iżuru portijiet fil-Krimea ħlief f’każ ta’ emerġenza; projbita wkoll l-esportazzjoni ta’ oġġetti teknoloġiċi lil kumpaniji tal-Krimea li jintużaw fis-settur tat-trasport, telekomunikazzjoni u enerġija (bħall-esplorazzjoni u l-produzzjoni taż-żejt, gass u riżorsi naturali). Assistenza teknika fil-qasam tal-kostruzzjoni u l-inġinerija relatati mal-infrastruttura wkoll ma jistgħux jingħataw minn ċittadini jew kumpaniji Ewropej.