SPINTA LILL-POLITIKA EWROPEA TA’ DIFIŻA

L-UE qablet li tagħti spinta lill-ħolqien ta’ Ewropa ta’ Difiża bi Struttura Permanenti ta’ Kooperazzjoni  (PESCO). L-istati membri għandhom tliet xhur biex ifasslu lista komuni ta’ kriterji li bihom jimpenjaw irwieħhom f’din il-politika. Il-kriterji jridu jaqblu mat-Trattat ta’ Lisbona u jinkludu l-viżjoni ta’ missjonijiet diffiċli ħafna.

Il-Kunsill tal-Unjoni Ewropea qal li flimkien mal-lista, irid jitfassal ukoll pjan ta’ żmien preċiż biex l-istati membri jistqarru l-intenzjonijiet tagħhom li jipparteċipaw mingħajr dewmien. Il-President tal-Kunsill Donald Tusk qal li dan huwa pass storiku għax permezz ta’ din il-kooperazzjoni l-UE se timxi lejn aktar integrazzjoni fil-qasam tad-difiża.

Angela Merkel qalet li l-UE se tkun qed twettaq missjonijiet bħal fl-Afrika li ma jiffokawx biss fuq l-aspett militari, iżda jinkludu wkoll kooperazzjoni, żvilupp u toroq diplomatiċi.

It-28 pajjiż qablu li l-preżenza tas-suldati titħallas b’mod permanenti minn fond komuni mmexxi mill-UE (Athena mechanism).

Il-Kunsill tal-Unjoni Ewropea qabel li tkun implimentata malajr il-proposta tal-Kummissjoni dwar Fond Komuni Ewropew ta’ Difiża. Il-President Franċiż Emmanuel Macron esprima s-sodisfazzjon tiegħu għall-ammont ta’ flus u għall-parametri li se jkollu dan il-fond komuni. Il-Kunsill tal-Unjoni Ewropea talab lill-istati membri biex jidentifikaw proġetti li jistgħu jsiru b’dan il-fond fil-qasam tad-difiża.