“REFERENDUM  INVALIDU FIL-MAĊEDONJA ” – IR-RUSSJA

Ir-Russja qalet li n-nuqqas ta’ interess fir-Referendum minn nies tal-Maċedonja tagħmlu invalidu u tfisser li din id-deċiżjoni se tkun sfurzata fuq iċ-ċittadini ta’ dan il-pajjiż.

Fir-referendum tal-Ħadd li għadda aktar minn 91% tal-votanti kienu favur it-tibdil fl-isem tal-pajjiż biex jintemm il-battibekk mal-Greċja, u biex dan il-pajjiż jibda t-triq għas-sħubija fin-NATO u fl-Unjoni Ewropea.  Iżda bir-referendum inqala’ tħassib kbir hekk kif anqas minn 37% tal-popolazzjoni ħarġet tivvota, persentaġġ ferm inqas mill-50% li kien hemm bżonn biex ir-referendum jitqies bħala legalment validu.

Ir-referendum kien ibbojkotjat mill-opponenti tal-Prim Ministru Zaev li fost oħrajn xtaq iwaqqaf l-influwenza Russa fil-Balkani u jkun aktar viċin il-mexxejja politiċi tal-Punent. Il-politikanti tal-partiti l-oħra kollha interpretaw ir-riżultat favur tagħhom. Il-pajjiż, ta’ 2.1 miljun ruħ se jiddeċiedi fil-Parlament, fejn biex jgħaddi tibdil fil-kostituzzjoni jeħtieġ il-qbil minn żewġ-terzi tal-kamra.

Kollox inċert hekk kif anki l-Parlament Grieg irid jaqbel mal-isem il-ġdid tal-Maċedonja minħabba raġunijiet territorjali. Il-Greċja fil-passat użat il-veto kontra s-sħubija tal-Maċedonja fin-Nato u l-UE.

Il-Prim Ministru Zaev qal li l-vot kien finali u li r-rieda taċ-ċittadini għandha tkun irrispettata. L-UE qalet li l-vot kien suċċess u ħeġġet lil Parlament tal-Maċedonja jimplimenta l-ftehim mal-Greċja. Il-Kummissjoni Ewropea qalet li r-referendum kellu ‘appoġġ wiesa’. Iżda politiċi oħra  qalu li l-ftehim ma għaddhiex għax dawk li ma vvutawx jew ivvotaw le għamlu ħoss akbar.