X’SE JMISSU GĦAWDEX MILL-BUDGET EWROPEW?

Bir-regoli attwali tal-UE, il-gżejjer tal-UE bħal Għawdex ma għandhomx ċans jibbenefikaw mill-pjan ta’ investiment ta’ Juncker. Dan qalu Alfred Sant  fil-Parlament Ewropew meta  qal li huwa essenzjali  li r-rekwiżiti tar-reġjuni fil-periferija, speċjalment tal-gżejjer żgħar bħal Għawdex, jiddaħħlu fl-ippjanar ta’ programmi ta’ finanzjament. Dawn id-diffikultajiet mhux minħabba raġunijiet nazzjonali, iżda minħabba l-mod kif inhuma mfasslin il-programmi tal-UE.

Dr Sant qal li żoni insulari tal-UE qed jaffaċċjaw diffikultajiet kbar meta jipprovaw jiksbu aċċess għal finanzjament tal-UE, aħseb u ara jassorbuhom.

“Gżejjer bħal Għawdex iridu mhux biss jegħlbu l-ostakli legali u amministrattivi li għandu kulħadd. Ikollhom jegħlbu wkoll ostakli fiżiċi li jaffettwaw direttament il-fluss tal-aktar prodotti u servizzi bażiċi,” qal Alfred Sant. Nhar il-Ġimgħa 5 ta’ Ottubru l-Uffiċċju ta’ Għawdex ta’ Alfred Sant se jorganizza Konferenza bit-tema “X’se jmissu Għawdex mill-Budget Ewropew” fil-Lukanda Ta’ Ċenċ, is-Sannat Għawdex.