TONQOS IL-PRODUZZJONI TAL-INBID EWROPEW

Il-produzzjoni tal-inbid fl-Ewropa naqset mis-sena l-oħra minħabba kundizzjonijiet klimatiċi. Xi stati membri sofrew min-nixfa kbira waqt li oħrajn sofrew minn borra u ġlata. Dan ikkonfermatu Copa-Cogeca li tirrappreżenta l-bdiewa u l-koperattivi agrikoli Ewropej.

L-Italja tibqa’ l-ikbar produttriċi Ewropea tal-inbid 50.3 miljun ettolitru (mel) kkomparat ma’ 51.5 mel tal-2015. Fi Franza l-produzzjoni mistennija li tkun 12% inqas mis-sena l-oħra (42 mel). Il-produzzjoni fi Spanja tlaħħaq 41.5 mel, ftit inqas mis-sena l-oħra. Il-Ġermanja wkoll naqset ftit mill-produzzjoni tagħha hekk kif din is-sena se jkollha 8.55 mel mill-8.87 tas-sena l-oħra. Il-produzzjoni Portugiża se tkun 20% anqas minn tas-sena l-oħra filwaqt li l-Awstrija u l-Ungerija sofrew ħafna ħsara minn ġlata.