VJAĠĠI GĦAL ŻGĦAŻAGĦ FIL-PERIFERIJA TAL-EWROPA

Il-Kummissjoni Ewropea se tiffinanzja vjaġġi għal żgħażagħ fl-UE li jinkludu l-gżejjer u r-reġjuni fil-periferija tal-Ewropa fosthom Malta, Ċipru, l-Islanda, Guadalupe u l-gżejjer Kanarji. MOVE2LEARN, LEARN2MOVE hija inizjattiva ġdida biex iżżid il-mobilita` taż-żgħażagħ fil-pajjiżi Ewropej u se tinvolvi l-finanzjament ta’ bejn 5,000 u 7,000 żagħżugħ u żagħżugħa ta’ etajiet bejn is-16 u d-19-il sena.

Il-Kummissjoni ħadet €2.5 miljun ewro direttament mill-proġett tal-Erasmus +. Min jintgħażel ikun intitolat bejn €350 u €530 ewro għal xiri tal-biljett tal-ajru u ta mezzi tat-trasport oħrajn.

Eleġibbli għal dal-proġett huma biss il-parteċipanti tal-eTwinning network, proġett fejn membri ta’ skola Ewropea jikkomunikaw ma’ membri ta’ skola oħra fl-Ewropa. Kriterji oħra li fasslet l-Unjoni għal min irid jipparteċipa f’dan il-proġett huma relatati mal-emissjonijiet tal-mezzi tat-trasport użati mill-parteċipanti u t-tul tal-vjaġġ. L-applikazzjonijiet infetħu fl-20 ta’ Marzu u jagħlqu fit-30 ta’ Ġunju. Dawk magħżula għandhom sal-31 ta’ Diċembru tal-2018 biex jużaw dawn il-fondi.