10% TAL-KAROZZI BIL-GASS SAL-2030

Produtturi ta’ karozzi li jaħdmu bil-gass naturali jgħidu li sas-sena 2030 se jkollhom 10% tas-suq Ewropew u saħansitra 20-30% tas-suq tat-trakkijiet u karozzi tal-linja. Dan ifisser 13-il miljun karozza.

It-trasport sostenibbli huwa fl-aġenda tal-UE. It-teknoloġija tal-karozzi bil-gass ilha teżisti għal mill-inqas 20 sena fl-Ewropa. Hawn madwar 25 miljun karozza li taħdem bil-gass naturali fid-dinja. Fl-Ewropa hemm biss 1.3-1.4 miljun karozza; 0.5% tas-suq Ewropew. Ħafna minn dawn il-karozzi qegħdin fl-Italja minħabba d-disponibilita` tal-gass iżda l-Ġermanja wkoll qed tinvesti f’dan is-suq.

Il-karozzi tal-gass huma alternattiva għal karozzi tal-elettriku u bħalhom ma jniġġsux bħal petrol u d-diesel.

Il-produtturi tal-karozzi bil-gass isostnu li fil-futur il-karozzi tal-elettriku se jkunu aktar popolari. Dawn mhux se jirnexxielhom jieħdu s-suq kollu għax jitlob investimenti kbar. Is-suq irid joffri alternattivi u jrid ikun maqsum bejn karozzi tal-elettriku u dawk li jaħdmu b’gassijiet differenti, inkluż il-hydrogen.

Il-Ministru Norveġiż Vidar Helgesen qal li l-magni diesel u petrol huma tal-passat.

Il-politikanti m’għandhomx jipproteġu industriji tal-passat li jniġġsu l-arja, iżda għandhom jinvestu f’teknoloġija ‘ħadra’ li ma tniġġisx. Ħarsa lejn it-toroq tal-bliet Ewropej turi li għalkemm l-affarijiet bdew jiċċaqalqu, l-petrol u d-diesel għalissa għadhom fjuwils importanti ħafna għat-trasport fl-Ewropa minkejja d-dannu li jikkawżaw lill-ambjent u lil bniedem.