€3 BILJUNI OĦRA GĦAR-REFUĠJATI FIT-TURKIJA

 

Il-Kummissjoni Ewropea pproponiet lill-istati membri tal-UE biex jimmobilizzaw €3 biljuni oħra għar-refuġjati Sirjani fit-Turkija. Il-Kummissarju tal-Immigrazzjoni Dimitris Avramopoulos qal li diġa` nħarġet is-somma ta’ €3 skont kif wiegħdet il-Kummissjoni Ewropea fl-2016. Dak iż-żmien il-Kummissjoni ssuġġeriet li biljun minnhom jittieħdu mill-baġit Ewropew filwaqt li €2 biljun ewro jingħataw mill-istati membri.

It-€3 biljun ewro li nħarġu ntefqu f’aktar minn 70 proġett li permezz tagħhom 500,000 tifel u tifla kellhom aċċess għall-edukazzjoni u 1.2 miljun refuġjat ibbenefikaw minn trasferimenti ta’ flus kontanti. It-Turkija min-naħa tagħha qalet li s-somma ma ngħatatx kollha u qed tkun rilaxxata bil-mod wisq.

“Il-finanzjament mhux għat-Turkija iżda huwa għar-refuġjati preżenti fit-Turkija u minkejja d-diffikultajiet, il-kooperazzjoni bejn l-Unjoni u t-Turkija hija meħtieġa biex jingħelbu “sfidi komuni”. qal Avramopoulos.

Fl-2016 kien ġie deċiż li l-gwardjani tal-kosta Torok ma jħallux lir-refuġjati jitilqu lejn l-UE u jintbagħtu lura lit-Turkija l-immigranti kollha Sirjani li jaslu fl-Ewropa biex jitolbu l-asil.

Il-Kummissjoni Ewropea temmen li din is-somma finanzjarja l-ġdida hija ta’ għajnuna għar-refuġjati u tagħti “sinjal b’saħħtu li t-Turkija u l-Unjoni Ewropea huma impenjati f’din ir-relazzjoni”.

Is-summit bejn it-Turkija u l-Unjoni f’Varna se jsir fis-26 ta’ Marzu. Il-Kummissjoni Ewropea qed tistenna summit “ta’ suċċess”.