7000 GĦAWDXI JAĦDMU MALTA

Rappreżentanti tal-‘Assoċċjazzjoni tal-Impjegati Għawdxin f’Malta’ ltaqgħu mal-Kap tad-Delegazzjoni Laburista fil-Parlament Ewropew Alfred Sant fix-Xewkija, Għawdex fejn iddeskrivew ir-realtajiet soċjali u ekonomiċi li jiltaqgħu magħhom kuljum l-Għawdxin li jaħdmu Malta. L-għan tal-għaqda huwa li jħarsu, jiffaċilitaw u jtejbu d-drittijiet, l-interess u l-kundizzjonijiet tax-xogħol tal-impjegati Għawdxin f’Malta. Aktar minn 7000 Għawdxi u Għawdxija jaħdmu f’Malta, 3000 fis-settur privat u 4000 fis-settur pubbliku.

“Aħna ninsabu minoranza f’minoranza. Napprezzaw jekk ittella’ l-vuċi  tagħna fuq livell Ewropew.” qalu ż-żgħażagħ lil Alfred Sant waqt li elenkaw problemi u tbatijiet li jaffaċċjaw biex jivvjaġġaw kuljum bejn iż-żewġ gżejjer u anke irreferew għall-kirjiet dejjem jogħlew għal dawk Il-ħaddiema Għawdxin li jaħdmu f’Malta.

Sean Zammit qal li hija problema għal impjegati Għawdxin li ta’ kuljum jaqsmu minn Għawdex għal Malta għax-xogħol. “L-ispejjeż tat-trasport dejjem jiżdiedu. Nikkalkolaw li nitilfu 48 ġurnata kull sena nivvjaġġaw bejn iż-żewġ gżejjer għax-xogħol.”

Dr Sant stieden liż-żgħażagħ biex jagħmlu studju dwar il-problemi u l-ispejjeż tat-trasport u jipproponu soluzzjonijiet għall-konsiderazzjoni tal-awtoritajiet.

Dr Sant qal li qed jaħdem ma’ MEPs minn gżejjer Ewropej biex il-vuċi ta’ dawk li jgħixu fil-gżejjer u fil-periferja tal-Ewropa tasal bi proposti konkreti quddiem il-KE.  Qal li flimkien ma’ MEP Kroat li jirrappreżenta l-gżejjer Kroati kkonvinċew lill-KE tniedi proġett ta’ €12-miljun għal ambjent aktar nadif fil-gżejjer Ewropej.