KONNETTIVITA` GĦAL GŻEJJER KROATI BL-GĦAJNUNA TAL-ISTAT

Il-Kummissjoni Ewropea approvat finanzjament pubbliku Kroat għal ħames konnessjonijiet regolari bejn il-gżejjer Kroati u l-kontinent Ewropew. Il-kumpaniji marittimi magħżula b’tender se jkunu qed jieħdu kumpens ta’ €33.8 miljun talli joffru servizz pubbliku. Dan il-kumpens se jkopri d-differenza bejn id-dħul mill-biljetti tal-vapur u l-ispiża tat-tħaddim tal-vapuri regolarment. Għadd ta’ gżejjer se jibbenefikaw minn dan il-mezz ta’ konnettivita` bil-baħar: Ugljan, Ošljak, Pašman u Hvar. Il-Kummissjoni Ewropea approvat din il-miżura għax ħasset li kienet meħtieġa biex jitħaddmu r-rotot inkwistjoni. Il-Kummissjoni Ewropea ħasset li dan mhux se jaffettwa il-kompetizzjoni fis-suq intern u għalhekk approvatha skont ir-regoli tal-UE dwar l-għajnuna mill-istat għal servizzi ta’ interess ekonomiku ġenerali.