ARJA AKTAR NADIFA FIL-GŻEJJER TAL-UE

Il-Kummissjoni Ewropea informat lill-Ewroparlamentari Malti Alfred Sant u l-Ewroparlamentari Kroat Tonino Picula li laqgħet il-proposta tagħhom u se tinvesti €10 miljuni favur il-proġett ‘Insaħħu l-kooperazzjoni fil-qasam tal-klima fil-gżejjer tal-UE’. Il-KE kienet diġa` approvat €2 miljuni għall-istess proġett. Dr Sant, ex-Prim Ministru u s-Sur Picula, ex-Ministru tal-Affarijiet Barranin tal-Kroazja, fl-aħħar xhur ħadmu fuq l-implimentazzjoni tal-proġett għal arja aktar nadifa fil-gżejjer tal-Unjoni Ewropea. Picula jirrappreżenta  gżejjer Kroati filwaqt li Dr Sant talab lil Kummissjoni Ewropea tipprovdi fondi għal ħolqien ta’ enerġija nadifa fil-gżejjer tal-UE, inklużi f’Malta u Għawdex.

Id-Direttur Ġenerali tal-KE għall-Enerġija Christopher Jones, responsabbli għall-politika esterna u l-iżvilupp ta’ għodod finanzjarji qal lil Dr Sant u lis-Sur Picula li l-Kummissjoni qablet mal-proposti tagħhom.

“L-għan ewlieni tagħna huwa t-tkabbir. Aħna rridu gżejjer abitabbli” qal is-Sur Jones lil Ewroparlamentari Malti u Kroat.

Il-KE se tidentifika 20 gżira bħala ‘case-study’.

Picula qal li hu favur l-aċċessibilita` għall-enerġija fi gżejjer żgħar.

“Irridu niżguraw l-għixien fuq il-gżejjer. Irridu għalhekk nidentifikaw il-limitazzjonijiet, speċjalment tal-gżejjer żgħar u  jkollna aċċessibilita` għall-enerġija nadifa.”

Dr Sant iddeskriva r-risposta tal-Kummissjoni bħala “pożittiva”.

“Importanti li l-KE tagħraf li ċ-ċittadini li jgħixu fuq gżejjer ibatu minn problemi ta’ insularita` doppja u allura għandhom bżonn lill-Kummissjoni tilleġiżla u tapprova proġetti favur dawn il-gżejjer,” qal Dr Sant.