FAVUR TRASPARENZA, KONTRA L-ARMONIZZAZZJONI FIT-TASSAZZJONI

Alfred Sant esprima l-appoġġ tiegħu favur miżuri għal aktar trasparenza fit-taxxa iżda oppona l-proposti dwar miżuri għall-armonizzazzjoni tat-taxxa fuq livell Ewropew meta ntalab jindirizza l-konferenza “Nibnu sistema tat-taxxa fl-UE” organizzata mill-European Tax Adviser Federation (ETAF) fi Brussell.

Il-Kummissarju Ewropew Pierre Moscovici kien preżenti għal din il-konferenza li kellha l-għan tgħaqqad l-Ewroparlamentari, rappreżentanti tal-Kummissjoni Ewropea u l-Presidenti tal-Kunsill tal-UE u professjonisti fil-qasam tat-tassazzjoni bl-għan li jkun diskuss ir-rwol tal-intermedjarji f’ “sistema Ewropea ta’ taxxa aktar ġusta”.

“Huwa normali li l-korporazzjonijiet iridu jimminimizzaw il-kont tat-taxxa tagħhom, il-kwistjoni hija hux qed jagħmlu dan b’mod legali jew le. Nemmen li numru kbir ta’ korporazzjonijiet jixtiequ ippjanar tat-taxxa li hu legali u trasparenti,” qal l-Ewroparlamentari Malti.

Dr Sant saħaq li din il-leġiżlazzjoni “hija diġa` pass ’il quddiem li jiddefinixxi u jirregola kif se jkunu qed jaħdmu l-intermedjarji”. Mistoqsi dwar kif il-korporazzjonijiet se jkunu qed jirreaġixxu, l-MPE Malti saħaq li jista’ jkun hemm reazzjonijiet psikoloġiċi mill-klijenti, imma min-naħa l-oħra, “mhux il-korporazzjonijiet kollha huma immorali u qarrieqa”.