UĠIGĦ TA’ RAS GĦAŻ-ŻONA EWRO

Is-Summit bejn il-mexxejja tal-pajjiżi kollha tal-UE għada 15 ta’ Diċembru mistenni jiddiskuti proposta tal-Kummissjoni Ewropea dwar l-integrazzjoni taż-żona ewro. Pożizzjoni ċara tal-Ġermanja hija kruċjali ħafna f’dan ir-rigward u l-kollass għall-formazzjoni ta’ Gvern ġdid fil-pajjiż jista’ jwassal biex jieqfu għalissa dawn il-pjanijiet ambizzjużi u d-deċiżjonijiet ikunu posposti għas-Summit ta’ Ġunju tas-sena d-dieħla fi Brussell.

Il-ġimgħa l-oħra l-Kummissjoni Ewropea żvelat pjan li jagħtiha aktar poter fuq iż-żona ewro. Il-Kummissjoni qed tipproponi Ministru tal-Finanzi Ewropew sal-bidu tal-2019 li jkollu l-kariga li jgħasses fuq it-tmexxija tal-finanzi tal-istati membri u l-baġit Ewropew.

Il-Kummissjoni qalet li mhux se jkun hemm baġit għaż-żona ewro kif propost mill-President Franċiż Emmanuel Macron. Il-Kummissjoni insistiet li d-dħul fiż-żona ewro għandu jibqa’ miftuħ għat-tmien stati membri li għad mhux qed jużaw il-munita waħda. Dawn jirrappreżentaw 15% tal-ġid komuni tal-UE.

Il-pjan ppreżentat mill-Kummissjoni se jqanqal dibattitu dwar il-poter tal-Kummissjoni fuq l-istati membri, li se jkompli jiżdied.

Il-Kummissjoni qalet li l-bidliet se jagħmlu l-governanza taż-żona ewro ‘aktar trasparenti u aktar demokratika’ għax il-PE se jkollu aktar sorveljanza, speċjalment jekk il-president tal-grupp tal-ewro jkun ukoll kummissarju.

Jidher ċar li s-Summit ta’ għada mhux se jkun it-tmiem tal-istorja għaliex l-istati membri mhux kuntenti jagħtu aktar poteri lill-istituzzjonijiet tal-UE filwaqt li huma jitilfu aktar saħħa fuq is-sovranita` finanzjarja tagħhom.