L-IRLANDA TIĠBOR  IT-TAXXI DOVUTI MILL-KUMPANIJA APPLE

Il-Gvern Irlandiż se jibda jiġbor it-taxxa dovuta mill-Kumpanija Apple fil-bidu tal-2018.

F’Ottubru li għadda l-Kummissjoni Ewropea rreferiet lill-Irlanda lill-Qorti tal-Ġustizzja tal-UE. Dan għaliex dan l-istat membru ma ħax azzjoni wara li fl-2016 l-istituzzjonijiet Ewropej talbuh jiġbor €13-il biljun f’taxxi dovuti mill-kumpanija Apple. L-istituzzjonijiet Ewropej ikkonkludew li l-ftehim li kien sar bejn l-awtoritajiet tat-taxxa Irlandiżi u l-kumpanija multinazzjonali Amerikana għal perijodu 2003-2014 huwa ekwivalenti għall-għajnuna tal-istat u li kien jikser ir-regoli tal-UE.

Il-flus se jitħallsu f’kont ta’ entitajiet terzi biex l-Irlanda turi li qed tieħu azzjoni, u fl-istess ħin ikollha l-opportunita` tiddefendi l-pożizzjoni tagħha quddiem il-Qorti.