TOKYO U L-UE JAQBLU DWAR KUMMERĊ ĦIELES

Il-President tal-Kummissjoni Ewropea Jean Claude Juncker iltaqa’ mal-Prim Ministru Ġappuniż Shinzo Abe fi Brussell biex iffinalizzaw l-aħħar dettalji ta’ ftehim ekonomiku bejn iż-żewġ naħat. Il-ftehim se jkun qed ikopri 99% tal-kummerċ ta’ oġġetti bejn iż-żewġ naħat. Dan huwa l-iktar ftehim ta’ kummerċ importanti li qatt innegozjat l-UE. Il-Ġappun huwa r-raba’ l-ikbar ekonomija tad-dinja.

Il-kapitli dwar il-kummerċ huma lesti. Issa jmiss ftehim dwar il-kapitli relatati mal-investiment. Għalissa l-istandards taż-żewġ naħat għadhom differenti wisq. “Jeħtieġ ftit aktar żmien biex jintlaħaq ftehim f’dan il-qasam.” qalet il-Kummissarju Ewropea tal-Kummerċ Cecilia Malmstrom.

Bil-ftehim 85% tal-esportazzjoni tal-ikel tal-UE lejn il-Ġappun se tkun liberalizzata. Min-naħa tagħha l-Unjoni Ewropea qed toffri aċċess aħjar fis-suq tagħha għas-settur tal-karozzi u spare parts Ġappuniżi. Għal prodotti tal-ħalib, l-UE kisbet ftuħ gradwali fis-suq Ġappuniż fuq ċertu tip ta’ ġobon. Rigward xorb alkoħoliku u inbid, mal-implimentazzjoni tal-ftehim se jitneħħa d-dazju ta’ 15%. Il-kummerċ ta’ prodotti bħal gallettini, għaġin u ċikkulata se jkun liberalizzat ftit ftit fuq perijodu ta’ għaxar snin.

Għal karozzi Ġappuniżi se jitneħħew it-taxxi fl-UE fuq karozzi privati.

L-Ewropej u l-Ġappuniżi stabilew prinċipji komuni fuq ir-regoli ta’ governanza tal-kumpaniji, kompetizzjoni, sussidji u intrapriżi tal-istat, kif ukoll dwar l-appoġġ lil kumpaniji żgħar u medji.