FID-DUBJU N-NEGOZJATI TAL-BREXIT

L-UE qed tistenna li tibda n-negozjati tal-Brexit iżda r-riżultat tal-elezzjonijiet fir-Renju Unit li kellhom l-għan jagħtu aktar saħħa lil PM Ingliża Theresa May, ħallew lil partit Konservattiv tagħha mingħajr maġġoranza fil-Parlament.

Il-Konservattivi rebħu l-ikbar ammont ta’ siġġijiet fil-Parlament Ingliż (318 minn 650) iżda kellhom bżonn 8 siġġijiet oħra biex jiksbu l-maġġoranza. Theresa May qalet li se taħdem mal-Partit tal-Unjoni Demokratika tal-Irlanda ta’ Fuq (DUP) li rebaħ 10 siġġijiet biex permezz ta’ koalizzjoni miegħu tikseb maġġoranza ta’ siġġijiet. Dan il-partit ukoll huwa favur il-Brexit.

Ħafna interpretaw ir-riżultat tal-elezzjonijiet bħala turija li l-poplu jrid ‘soft’ Brexit biex ir-Renju Unit tkun aktar qrib l-Unjoni Ewropea anki jekk ma tibqax membru sħiħ.

May qalet li n-negozjati xorta se jibdew nhar it-tnejn 19 ta’ Ġunju kif xtaqet il-Kummissjoni Ewropea. It-taħdidiet għandhom isiru fi Brussell għalkemm għad ma hemmx qbil formali dwar id-data, il-post eżatt u bosta dettalji oħra.

Il-President tal-Kunsill tal-Unjoni Ewropea Donald Tusk qal li, ‘ma hemmx ħin x’nitilfu’ la n-negozjati jridu jkunu lesti sa Marzu tal-2019.