IL-PRESIDENT TUNEŻIN FI BRUSSELL

Il-President Tuneżin Beji Caid Essebsi beda żjara fi Brussell. L-UE qed tgħid li lesta tgħin lit-Tuneżija u pajjiżi ġirien tal-Mediterran jekk dawn jieħdu deċiżjonijiet politiċi u ekonomiċi serji u jwettqu riformi soċjali. Fl-istess żmien f’Tunis intemmet konferenza dwar l-investiment Ewropew bl-għan li jsir ftehim finanzjarju. Il-Bank Ċentrali Ewropew wiegħed appoġġ li jammonta għal €2.5 biljun ewro sal-2020 lit-Tuneżija. Il-Bank Ewropew għar-Rikostruzzjoni u Żvilupp diġa` pprovda €350 miljun f’assistenza u qed iwiegħed li jinvesti €650 miljun ieħor. Ftit mill-programmi ta’ għajnuna jiffokaw fuq proġetti bħal pereżempju dawk għal ħolqien tal-enerġija mix-xemx.

Il-Kap tad-delegazzjoni tal-UE għat-Tuneżija, l-ambaxxatur Patrice Bergamini qal li mill-2011 l-UE saret l-aktar istituzzjoni li tipprovdi fondi lil dan il-pajjiż, u issa b’mod aktar massiv. Il-Parlament Ewropew fost oħrajn, ippropona Marshall Plan għat-Tuneżija li qanqal ħafna dibattitu fost il-poplu Tuneżin. Din il-proposta ma sabitx l-appoġġ tal-Kummissjoni Ewropea u tal-Kunsill tal-Ministri. L-Ambaxxatur qal li ‘Marshall Plan’ mhux espressjoni tajba għax għandha konnotazzjonijiet li toħodna lura għat-tieni gwerra dinjija, iżda qal li l-UE lesta tgħin lit-Tuneżija fil-bidliet li trid twettaq. L-Ambaxxatur qal li t-Tuneżija għandha sens qawwi ta’ demokrazija iżda dan il-proċess storiku qed jaffaċċja sfidi soċjali u ekonomiċi.

L-UE trid soluzzjonijiet fuq livell reġjonali f’dan il-pajjiż. Uħud mill-isfidi tat-Tuneżija huma simili bħal tal-ġirien tagħha. Il-metodi użati fuq livell reġjonali huma introdotti biex jiġġieldu t-terroriżmu u l-qgħad fost iż-żgħażagħ. Wara r-Rebbiegħa Għarbija tal-2011 ħafna Tuneżini ppretendew għajnuna mill-Unjoni Ewropea.