IL-VISA LIT-TOROK TRID AKTAR ŻMIEN

Il-Kanċilliera Ġermaniża Angela Merkel qalet li jeħtieġ aktar żmien għal-liberalizzazzjoni tal-Visa lit-Torok, minħabba li l-President Tork Erdogan għadu qed jirrifjuta li jbiddel il-liġijiet dwar it-terroriżmu ta’ pajjiżu.

Merkel ma taħsibx li dan se jaffettwa l-ftehim bejn it-Turkija u l-UE dwar l-immigranti.

Id-dokument dwar il-liberalizzazzjoni tal-Visa għaċ-ċittadini Torok se jkun eżaminat fl-14 ta’ Ġunju minn grupp ta’ esperti tal-Kunsill. Mhux se tittieħed deċiżjoni dwar it-Turkija qabel is-summit Ewropew tat-28 u 29 ta’ Ġunju. Din il-ġimgħa, il-Kummissjoni bagħtet xi esperti Ankara għal aktar taħditiet.

Ftit xhur ilu l-mexxejja Ewropej kienu qablu li l-liberalizzazzjoni tal-Visa lit-Torok tingħata fl-aħħar ta’ Ġunju jekk ikunu ntlaħqu it-72 kriterju mitluba minn dan il-pajjiż. Din id-data tista’ titressaq għal Ottubru peress li t-Torok għadhom ma wettqux l-obbligi kollha tagħhom.