UTOPIA FI SPANJA

Marinaleda hija belt Spanjola mingħajr qgħad, kriminalita` u mingħajr bżonn ta’ pulizija.  Mhix ħolma. Tinsab fin-nofsinhar ta’ Spanja.  Deskritta bħala belt soċjal-demokratika perfetta. Trankwilla, mdawra b’għoljiet ħodor, b’kilometri ta’ siġar taż-żebbuġ u għelieqi dehbiena tal-qamħ. Hija belt tipika tal-Andalusia, ir-reġjun l-inqas sinjur ta’ Spanja.

Marinaleda saret famuża l-aktar permezz tas-sindku tagħha Juan Manuel Sanchez Gordillo magħruf bħala Robin Hood. Elett b’mod demokratiku fl-1979, Gordillo huwa kontra l-kapitaliżmu. Ordna sensiela ta’ ‘raids’ f’supermarkets. Oġġetti bażiċi tal-ikel bħar-ross u żejt ittieħdu mill-ħwienet biex jingħataw lill-foqra. Gordillo jgħid li dan ma kienx serq imma diżobbedjenza mhux vjolenti. “Hawn ħafna familji li ma jaffordjawx l-ikel,” argumenta Gordillo, “fis-seklu 21 din hija diżgrazzja. L-ikel huwa dritt u mhux xi ħaġa li biha tista’ tispekula.”

F’Marinaleda min irid jibni d-dar tiegħu jingħata 192 metru kwadru ta’ art, biżżejjed għal dar spazjuża. Il-materjal u l-ħaddiema huma provduti mill-Kunsill. Il-familji mbagħad iħallsu biss 15-il ewro fix-xahar għall-kumplament ta’ ħajjithom, bil-patt u l-kundizzjoni li ma jistgħux ibigħu d-dar u jaqilgħu l-flus minnha.

Fl-Andalusia l-qgħad qiegħed 37%, għaż-żgħażagħ sploda għal 55%.  Imma f’Marinaleda, li għandha popolazzjoni ta’ 2700, m’hemmx qgħad bis-saħħa tal-kooperattiva agrarja. Il-ħaddiema jaqilgħu kollha l-istess – paga ta’ 1200 ewro fix-xahar. F’dan ir-reġjun, fejn 1 minn kull 3 persuni ma għandhomx xogħol, din il-kisba hija waħda kbira.

‘Hemm bżonn li nikkontemplaw fuq il-valuri, is-soċjeta` konsumerista, il-valur li nagħtu lill-flus u l-individwaliżmu.” Marinaleda hija eżempju żgħir. Is-sindku jixtieq li dan l-eżempju ssir taf bih id-dinja kollha.