SENA NIFS GĦAL SPANJA DWAR ID-DEFIĊIT

Il-Kummissjoni Ewropea rrakkomandat lil Spanja sena oħra biex treġġa’ lura d-defiċit tal-gvern taħt it-3% tal-PGD, kif jitolbu r-regoli tal-UE. Fl-2015 id-defiċit qabeż il-5%. Spanja għaddejja minn instabilita` politika hekk kif fl-elezzjonijiet ta’ Diċembru ma rnexxilhiex tifforma gvern. Elezzjonijiet ġodda se jsiru fis-26 ta’ Ġunju. Il-pajjiż baqa’ jitmexxa mill-Gvern ċentru-lemin ta’ Rajoy li qed ikun ikkritikat li waqt li qed iwiegħed tnaqqis fit-taxxa lill-elettorat, qed jitkellem xort’oħra fuq livell Ewropew.

Il-Ministru tal-Finanzi Ġermaniż Wolfgang Schäuble kkritika bl-aħrax lill-Kummissjoni Ewropea. Qal li mhix kapaċi tieħu deċiżjoni rigward Spanja u l-Portugall li qed jiksru r-regoli ekonomiċi tal-UE.

Il-Ministri tal-Finanzi taż-żona Ewro mistennija jilqgħu t-talba tal-Kummissjoni dan ix-xahar. Jekk dan ma jseħħx Spanja ssir esposta għal sanzjonijiet finanzjarji minħabba defiċit eċċessiv.