JIKKONTESTA DIKJARAZZJONI TAL-KUMMISSJONI EWROPEA DWAR MALTA

F’Mistoqsija Parlamentari urġenti lill-Kummissjoni Ewropea Alfred Sant ikkontesta dikjarazzjoni tal-KE li qalet li rakkomandazzjonijet speċifiċi dwar ‘non-performing loans’ kienu indirizzati lill-Bulgarija, Ċipru, l-Irlanda, l-Italja u Malta.

Self mal-banek fejn l-imgħaxijiet dovuti u l-pagamenti li bihom il-kapital imsellef ma jintraddx lura lill-bank jissejħu ‘non-performing loans’ (NPL). Din hija problema kruċjali għal banek ewlenin madwar id-dinja u waqfet il-progress għal għaqda bankarja fiż-żona ewro.

Alfred Sant talab lill-KE tispjega għala inkludiet lil Malta fil-Komunikazzjoni, meta l-istess punt ma jidher imkien fir-Rakkomandazzjoni Speċifika indirizzata lil Malta ta’ din is-sena.

Fl-analiżi ekonomika fir-rapport ta’ Marzu 2018, il-KE qalet li l-andament ekonomiku tajjeb ta’ Malta jinsab rifless fis-settur bankarju. Il-KE enfasizzat li ma hemm l-ebda riskji marbuta man-‘non-performing loans’ f’Malta li huwa 3.7% tal-Prodott Gross Nazzjonali.

Skont l-Awtorita` Bankarja Ewropea (EBA), il-medja ta’ ‘non-performing loans’ tal-banek Ewropej hija 4% tal-Prodott Gross Nazzjonali, ogħla minn dik ta’ Malta.

Sant talab lill-KE tikkjarifika x’tikkonsidra li jkun sehem “kbir” ta’  ‘non-performing loans’ tal-banek fil-pajjiżi tal-UE.

Il-Kummissjoni Ewropea hija marbuta li tirrispondi bi prijorita` l-intervent ta’ Alfred Sant.