MANIPOLAZZJONI TOTALI

Alfred Sant iddeskriva r-rapport tad-Delegazzjoni tal-Parlament Ewropew dwar Malta bħala ‘manipolazzjoni totali’. Dr Sant qal dan waqt dibattitu dwar il-liberta` tal-espressjoni fil-Belt Valletta. Dan ir-rapport kontra Malta sar fl-istess żmien li l-Ungerija u l-Polonja kienu qed jiġu akkużati bi ksur tas-Saltna tad-dritt f’pajjiżhom.

Dr Sant qal li l-problemi ta’ korruzzjoni f’pajjiżna  għandhom jiġu diskussi f’kuntest Ewropew.

“Mhumiex biss il-politiċi involuti fi kwistjonijiet ta’ governanza. Wieħed irid jifhem ir-realtajiet tal-fatturi soċjo-ekonomiċi u l-interessi kummerċjali b’saħħithom li jiddominaw ħajjitna. Ma nistgħux inkunu insulari dwar din ir-realta`. Din hija problema li tinsab fl-Ewropa u mhux problema ta’ Malta biss.”

Dr Sant semma l-iskandlu tal-kumpanija Ġermaniża Volkswagen b’karozzi li jaħbu l-emissjonijiet tad-diesel.

“Dan l-iskandlu ma nkixifx fl-Ewropa, iżda mill-Istati Uniti minħabba raġunijiet ta’ kompetizzjoni.”

Alfred Sant ikkundanna l-qtil ta’ Daphne Caruana Galizia, iżda qal li għad trid tiġi stabbilita r-raġuni għal dan l-att barbaru.

“Ma naqbel xejn mal-azzjonijiet ta’ dawk li qed jagħmlu l-protesti pubbliċi ma’ Kastilja u postijiet oħra, imma għandhom kull dritt jagħmlu hekk, kif għandhom kull dritt jikkritikawhom dawk li ma jaqblux magħhom”,  irrimarka l-MEP.