SPJUNAĠĠ FUQ IL-BAĦAR

L-Aġenzija tal-ħarsien tal-fruntieri FRONTEX se żżid l-ispjunaġġ fuq il-baħar permezz ta’ operazzjoni ġdida  ta’ spjunaġġ fiċ-ċentru tal-Mediterran li se tintraċċa nies suspettati b’terroriżmu u kriminali oħra. Dan l-eżerċizzju se jsir mill-Aġenzija tal-ħarsien tal-fruntieri FRONTEX li se tkompli bil-missjonijiet ta’ tiftix u salvataġġ meta jkun meħtieġ.

Il-mandat tal-FRONTEX li tiffoka aktar fuq is-sigurta` turi bdil fid-direzzjoni tal-Unjoni li qed tqis li potenzjalment il-persuni salvati fuq il-baħar jistgħu jkunu ta’ theddida. Kelliema għall-FRONTEX qalet li l-missjoni l-ġdida tal-Unjoni se tkun qed tiffoka l-aktar fuq is-sigurta`. ‘Il-ġbir ta’ informazzjoni permezz tal-ispjunaġġ u ta’ attivita` oħra se jsir bl-għan li nidentifikaw it-terroristi fuq il-fruntieri esterni.”

L-informazzjoni li se tinġabar mill-missjoni l-ġdida tal-FRONTEX se tingħata lill-awtoritajiet Taljani u lill-aġenziji Ewropej bħal Europol. Il-missjoni tkopri ż-żona ċentrali tal-Mediterran u tissorvelja l-mewġ tal-immigranti li jitilqu mill-Alġerija, it-Tuneżija, il-Libja, l-Eġittu, it-Turkija u l-Albanija. Issa qed tinkludi l-baħar Adrijatiku minħabba d-drogi li deħlin l-Ewropa mir-rotta tal-Albanija.

Il-FRONTEX diġa` għaddiet dettalji dwar persuni lill-aġenziji tal-Unjoni Ewropea bħal Europol. Is-sena l-oħra  l-aġenzija għaddiet mal-1, 300 mazz ta’ dokumenti ta’ spjunaġġ lill-Interpol.

Osservaturi politiċi jissuspettaw li l-enfażi tal-FRONTEX għall-attivita` l-ġdida qed issir biex jitwaqqfu l-influssi ta’ nies mill-kosta tal-Libja lejn l-Ewropa. Dawn huma organizzati minn gruppi kriminali li qegħdin jorganizzaw kutrabandu uman u jabbużaw minn eluf ta’ immigranti li jixtiequ jaqsmu mill-Afrika lejn il-kontinent.