MHUX KULL PAJJIŻ QED IŻOMM ID-DETTALJI TAL-PASSIĠĠIERI MIL-LINJI TAL-AJRU

Numru ta’ stati membri għadhom ma implimentawx pjan fejn il-linji tal-ajru jkunu mitluba jżommu dettalji dwar passiġġieri li jtiru magħhom. Il-Ġermanja, il-Greċja, il-Polonja, l-Awstrija, l-Ungerija, is-Slovakkja, l-Irlanda, il-Lussemburgu u Malta għad ma għandhomx dan il-pjan li għandu jidħol fis-seħħ fl-2018. F’Novembru l-Kummissjoni se tħabbar kif se tgħin fl-implimentazzjoni ta’ dan il-pjan u se tirrilaxxa €70 miljun bejn l-2017-2020 għal dan il-għan. Il-Kummissjoni se tirrilaxxa €3.8 miljuni oħra biex l-istati membri jaqsmu l-informazzjoni bejniethom u l-Europol.

Il-Kummissarju Brittanniku tas-Sigurta` tal-Unjoni Sir Julian King ħabbar li kull xahar se joħroġ rapporti dwar l-andament tal-qasam tas-sigurta` tal-UE biex jagħtih spinta. King għażel li jsaħħaħ ċertu oqsma bħall-ġlieda kontra r-radikalizzazzjoni u ċertu infrastrutturi. King qal li sal-aħħar tas-sena jrid jintlaħaq qbil dwar abbozz ta’ direttiva li tiġġieled it-terroriżmu, qbil fuq id-direttiva ta’ armi semi-awtomatiċi, kif ukoll iridu jinfetħu proċeduri kontra l-istati membri li mhux jixxerjaw id-DNA u l-fingerprints. Qed jissemmew ukoll ċertu proposti dwar il-fruntieri esterni tal-UE iżda għad irid jintlaħaq qbil dwarhom mill-Parlament u l-Kunsill Ewropew.