AKTAR FONDI LILL-PAJJIŻI ĠIRIEN TAL-UE GĦALL-KRIŻI TAL-IMMIGRAZZJONI

Il-Kummissjoni Ewropea se tagħti aktar fondi lill-pajjiżi ġirien tal-UE biex tikkontrolla aktar il-kriżi tal-immigrazzjoni fl-Ewropa. Il-Kummissjoni għalhekk qed tipproponi li żżid l-appoġġ għar-rifuġjati Sirjani b’€300 miljun. Il-Kummissarju Ewropew Johannes Hahn qed jittama li bil-kontribuzzjoni tal-Istati Membri, din is-somma tilħaq il-biljun ewro. Ir-Rappreżentanta tal-Affarijiet Barranin tal-UE Federica Mogherini tixtieq ukoll li l-istati membri jikkontribwixxu aktar għall-fond tal-Afrika, li bħalissa għandu €1.8 miljun.

Il-Kummissjoni qalet li lesta tagħti sa biljun ewro lit-Turkija fuq perijodu ta’ sentejn biex tgħinha tindirizza l-kriżi tal-immigrazzjoni. ‘It-Turkija sħab magħna fil-kriżi tal-immigrazzjoni’ qalet Mogherini, ‘u waħedha qed tospita 2 miljun refuġjat’. €17-il miljun huwa ppjanat li jmur għas-Serbja u għall-Maċedonja.

Il-Kummissjoni mistennija wkoll iżżid il-fondi għall-emerġenza umanitarja b’€200 miljun u mistennija temenda l-baġit tas-sena 2016 biex il-fondi ta’ emerġenza jlaħħqu €300 miljun u jintużaw għall-ħtiġijiet bażiċi tar-refuġjati. Għal issa hemm biss 38% tal-finanzi meħtieġa għal kriżi tas-Sirja. L-impatt ta’ dan in-nuqqas huwa drammatiku qalet il-Kummissjoni u żiedet li l-UE u l-Istati Membri jridu jikkommettu ruħhom u jkopru nofs dan l-iżbilanċ.

Il-kriżi tal-immigrazzjoni se tkun diskussa fis-samit li se jsir fil-Belt Valletta bejn 11-12 ta’ Novembru. Fix-xhur li ġejjin il-Kummissjoni mistennija li żżid l-offensiva diplomatika tagħha. Intant Mogherini qalet li jeħtieġ li tinsab soluzzjoni diplomatika urġenti għall-kriżi fis-Sirja, bit-tmun f’idejn il-Ġnus Magħquda.