LISTA TA’ PAJJIŻI LI JOFFRU SIGURTA` LIĊ-ĊITTADINI TAGĦHOM

Il-Kummissjoni Ewropea qed tinsisti li ssir lista komuni ta’ pajjiżi li joffru sigurta` liċ-ċittadini tagħhom, fejn hemm sistema demokratika b’mod konsistenti, m’hemmx persekuzzjoni, tortura u trattament inuman jew degradanti u m’hemmx theddid ta’ vjolenza u kunflitti bl-armi. Applikazzjoni għall-ażil fl-UE minn ċittadini li ġejjin mill-pajjiżi li jkunu fuq din il-lista ma jiġux aċċettatti u jintbagħtu lura pajjiżhom.

Bħalissa, 12-il stat membru – L-Awstrija, Belġju, Bulgarija, Repubblika Ċeka, Ġermanja, Franza, Irlanda, Lussemburgu, Latvja, Malta, Slovakkja, u r-Renju Unit – għandhom lista nazzjonali.

Il-President Juncker qed jissuġġerixxi li tinħoloq lista waħda għall-pajjiżi kollha tal-UE. Din tkun tinkludi l-Albanija, l-Bosnja u l-Herzegovina, Maċedonja, Kosovo, Montenegro, Serbja u t-Turkija (għalkemm din tal-aħħar qanqlet id-dubji minħabba l-kunflitti mal-Kurdi). Il-lista tkun tista’ tinbidel minn żmien għal żmien.

Amnesty International ma qablitx ma’ dil-proposta. Qalet li l-UE għandha taċċetta lir-rifuġjati u tagħtihom il-protezzjoni.

Il-mexxejja tal-pajjiżi tal-UE se jiddiskutu l-implimentazzjoni ta’ din il-lista komuni fis-summit li jmiss.