L-INDUSTRIJI ŻGĦAR U MEDJI FL-ISTATI GŻEJJER TAL-UE JEĦTIEĠU L-INKORAĠĠIMENT

Il-Kummissjoni Ewropea għandha tagħti attenzjoni speċjali u tgħin l-investimenti ta’ intrapriżi żgħar u medji fi stati gżejjer u r-reġjuni iżolati u li qegħdin fil-periferija tal-Unjoni Ewropea. Alfred Sant qal dan fil-Parlament Ewropew waqt diskussjoni dwar programm ġdid li l-Kummissjoni Ewropea qed tipproponi li ddaħħal biex impriżi fl-Ewropa jsibu finanzjar għall-proġetti tagħhom mingħajr ma jiddependu għal kollox mill-banek. Dr. Sant qal li dan huwa proġett li jeħtieġ jirnexxi, speċjalment biex ditti ġodda jkunu jistgħu jikbru u joħolqu l-impjiegi u l-ġid.

Ħafna kumpaniji żgħar u medji fl-UE jippreferu li l-ewwel jesperimentaw u jkabbru l-operat tagħhom f’pajjiżhom fejn ikunu stabilixxew ruħhom qabel ma joħorġu lil hinn mill-fruntiera ta’ pajjiżhom. Jekk jagħmlu suċċess f’pajjiżhom, aktar ikunu mħeġġa biex jespandu fi swieq Ewropej oħra. Il-fatturi kulturali li jiffurmaw il-qafas intraprenditorjali, ma jistgħux jiġu injorati. ‘L-aħjar ħaġa hija li kollox jibda fuq livell nazzjonali.’ sostna Dr.Sant.

Dr Sant qal li l-Ewropa teħtieġ tiżviluppa l-investiment fuq livell nazzjonali u anki fuq livell Ewropew. ‘L-Istati Uniti tagħmel dan aħjar mill-Ewropa. Qed jintqal li b’metodi ġodda għar-rilaxxament tal-kapital fuq skala Ewropea, inkunu qed nersqu aktar qrib il-livelli Amerikani tal-iffinzjar għall-intrapriżi. ‘Irridu niddefinixxu eżatt x’jagħmel is-swieq kapitali tal-Istati Uniti dinamiċi. Fl-istess waqt irridu wkoll nħajru s-swieq kapitali fuq livelli nazzjonali u nneħħu x-xkiel regolatorju u kulturali.’

Agħfas fuq din il-ħolqa biex issegwi l-intervent ta’ Dr Sant:

https://www.youtube.com/watch?v=1FXL2KmoNMc