XEJN DIFFERENTI MIR-RETTORIKA TAS-SOLTU – MERKEL U HOLLANDE JINDIRIZZAW LILL-PARLAMENT EWROPEW

Il-Kanċilliera Ġermaniża Angela Merkel u l-President Franċiż François Hollande saħqu li l-Ewropa teħtieġ it-tmexxija Franċiża-Ġermaniża fl-interess tal-għaqda Ewropea, tkellmu dwar l-importanza ta’ għaqda politika fil-kontinent Ewropew, għaqda li tirrispetta l-valuri li fuqhom hija mibnija l-Unjoni Ewropea sabiex l-Ewropa tilqa’ għall-kriżijiet kemm fi ħdanha u kemm fil-pajjiżi ġirien tagħha. Merkel u Hollande indirizzaw il-Parlament Ewropew flimkien, 26 sena wara li l-predeċessuri tagħhom – Helmut Kohl u François Mitterrand ħadu inizjattiva simili qabel l-unifikazzjoni tal-Ġermanja u l-ħolqien tal-Unjoni Ekonomika u Monetarja.

It-tnejn saħqu li hemm bżonn ta’ aktar Ewropa u biex il-pajjiżi ma jaġixxux fuq livell nazzjonali. Fi żmien ta’ kriżi l-biżgħa hija normali u jkun ħażin jekk nippruvaw insalvaw lilna nfusna biss. Hollande qal li s-soluzzjoni hija Ewropa b’saħħitha u kompla jgħid li hemm żewġ għażliet – jew li l-Ewropa tkompli tasserixxi ruħha jew li tispiċċa. It-tmiem tagħha jkun karatterizzat minn fruntieri nazzjonali u t-tmiem ta’ poltika komuni.

Merkel u Hollande semmew il-kriżijiet li qed taffaċċja l-Ewropa llum – finanzjarji, ekonomiċi, soċjali u umanitarji. Hollande qal li dawn id-diffikultajiet jistgħu jingħelbu permezz tas-solidarjeta` u r-responsabilita` li huma l-bażi ta’ kull azzjoni Ewropea.

Merkel qalet li mill-bidu tas-sena daħlu 600,000 refuġjat. L-Ewropa damet ma fehmet x’kienu se jkunu l-konsegwenzi ta’ dak li qed jiġri fil-Lvant Nofsani u fl-Afrika imma fl-istess waqt uriet solidarjeta` mal-Italja u l-Greċja u mal-pajjiżi li jmissu mas-Sirja. Merkel qalet li s-Sirja hija mifnija bil-kunflitti u li mhux faċli biex in-nies iħallu darhom, anki għall-immigranti ekonomiċi. L-influss tal-immigranti qed ibiddel l-aġenda politika tal-Ewropa. Hi saħqet li hemm bżonn ta’ aktar protezzjoni fil-fruntieri esterni tal-UE biex ikun garantit iċ-ċaqliq ħieles tan-nies fix-Xengen. Merkel qalet li jeħtieġ li t-Turkija tingħata l-għajnuna biex tintegra r-refuġjati li għandha f’pajjiżha u qalet li t-trattat ta’ Dublin ma għadux tajjeb.

Hollande semma’ s-solidarjeta` li uriet l-Ewropa fil-kriżi tal-Greċja u rringrazzja l-Ewropej talli kienu viċin Franza meta kien hemm l-attakk terroristiku f’Pariġi. Semma’ l-Ukrajna u qal li l-Ewropa taf tkun responsabbli u soda meta għamlet is-sanzjonijiet kontra r-Russja.

Kien hemm reazzjoni imħallta fil-Parlament Ewropew għaż-żewġ diskorsi. Min qabel u min ma qabilx. Fil-verita` ftit li xejn kien hemm differenti mir-rettorika tas-soltu.