ĊITTADINI EWROPEJ IRIDU JAGĦTU PROVA LI HUMA IMMIGRANTI LEGALI

Sabiex stat membru jipproteġi l-finanzi tiegħu, qabel ma jagħti l-benefiċċji soċjali lil ċittadini li ġejjin minn stati membri oħra, jista’ jivverifika l-leġittimita` tar-residenza tagħhom fuq it-territorju tiegħu.

Din kienet il-konklużjoni li ppreżentat il-Qorti Ewropea tal-Ġustizzja. Din is-sentenza ngħatat fit-tilwima bejn ir-Renju Unit u l-Kummissjoni Ewropea dwar xi aspetti legali fis-sistema tas-sigurta` soċjali. L-aspett legali diskuss f’dan il-kas kien id-dritt taċ-ċittadini b’passaport Ewropew li jitolbu l-benefiċċji tas-sigurta` soċjali fi stat membru ieħor.

Il-Kummissjoni Ewropea tellgħet lir-Renju Unit il-qorti għax skont il-liġi Brittannika, l-awtoritajiet jivverifikaw li ċittadini li qed japplikaw għall-benefiċċji soċjali huma residenti legali tar-Renju Unit qabel ma jingħatawlhom il-benefiċċji. Il-Kummissjoni qed tgħid li din il-proċedura ma taqbilx mal-liġijiet Ewropej. Il-Kummissjoni bbażat l-argument tagħha fuq ir-regolament li jiggarantixxi li s-sistemi nazzjonali tal-‘welfare state’ ma jiddiskriminawx liċ-ċittadini ewropej li jużaw id-dritt tagħhom li jiċċirkolaw u jgħixu f’pajjiżi membri tal-Unjoni Ewropea

L-Avukat Ġenerali rrakkomanda li ma jaċċettax it-talba tal-Kummissjoni għax qal li l-leġiżlazzjoni Brittannika ma tinponix aktar kundizzjonijiet minn dawk li titlob lir-residenti nattivi tagħha. Ir-Renju Unit jitlob l-eżaminazzjoni għall-aċċess ta’ xi tip ta’ sigurta` soċjali u l-legalita` tar-residenza tal-persuna. Dan kollu jsir fid-dawl tal-liġi tal-Unjoni Ewropea

Dan jimplika diskriminazzjoni indiretta bejn residenti Brittanniċi u residenti ta’ stati membri oħra li joqogħdu fir-Renju Unit, billi tkun imposta verifikazzjoni fuq dawn tal-aħħar, qabel ma jingħataw il-benefiċċji soċjali. L-Avukat Ġenerali qal li din id-diskriminazzjoni hija ġustifikata mill-ħtieġa li l-istat membru jipproteġi l-finanzi tiegħu billi jiżgura li ma jħallasx il-benefiċċji lil nies li ma jaqblux mar-rikwiżiti ta’ residenza legali msejħa mid-direttiva tal-UE. Hu qal li r-Renju Unit tidher li qed tagħmel kontrolli tajbin f’dan kollu.

Il-Gvern Ingliż apprezza dan il-punt legali li jaqbel mal-ħsieb tiegħu jiġifieri li pajjiżu jagħti l-benefiċċji soċjali lil dawk l-immigranti Ewropej li għandhom id-dritt li jkunu fir-Renju Unit.

Il-Kummissjoni Ewropea diġa` għamlitha ċara li aktar tard din is-sena se tipproponi pakkett ta’ leġiżlazzjonijiet dwar il-mobbilta` tal-ħaddiema, li se jkollha proposti biex tbiddel ir-regoli tal-UE fuq il-koordinament tas-sistemi tas-sigurta` soċjali.