‘L-UE M’GĦANDHIEX TAPPLIKA BIL-GĦAMA REGOLI TA’ ‘ONE-SIZE FITS ALL’ FIL-QASAM TAL-KOMPETIZZJONI’

Fit-tmexxija tal-politika tal-kompetizzjoni l-Unjoni Ewropea m’għandhiex tapplika bil-għama regoli ta’ ‘one size fits all’ għax dan ikun ta’ detriment għall-pajjiżi ż-żgħar fil-periferija tal-Unjoni Ewropea. Dr Alfred Sant, Shadow Rapporteur għas-Soċjalisti u d-Demokratiċi (S&D) qal dan fl-ewwel skambju ta’ ideat dwar ir-rapport annwali fuq il-kompetizzjoni fil-Kumitat Ekonomiku u Monetarju (ECON) tal-Parlament Ewropew. Dr. Sant saħaq li bħala rappreżentant ta’ stat ċkejken, l-analiżi li jagħmel hija li l-metodu li jintuża qed ikun wisq ta’ ‘one size fits all’. ‘Dan huwa ħażin. Mhux metodu tajjeb li kulħadd jiġi trattat bl-istess mod. Irridu nkunu konxji li metodu bħal dan ma jagħmilx distinzjoni bejn reġjuni u reġjuni oħra, bejn pajjiżi u pajjiżi oħra, u bejn sitwazzjonijiet ekonomiċi ta’ pajjiżi u reġjuni differenti.’

Dr. Sant semma x-xogħol li twettaq il-fergħa tal-Kompetizzjoni tal-Kummissjoni Ewropea. ‘Jeżistu żewġ estremi ta’ kif jaħdmu l-affarijiet. ‘Fuq naħa hemm kif qed jiġu ttrattati ż-żoni fil-periferija, il-gżejjer, u ż-żoni maqtugħin miċ-ċentru. Nieħdu l-każ ta’ Cyprus Airways li kellha tagħlaq dan l-aħħar. Cyprus Airways u linji tal-ajru tat-trasport ta’ dan it-tip, li joperaw fuq reġjuni fil-periferija, bl-ebda mod ma jistgħu jaffettwaw il-kompetizzjoni fuq l-iskala l-kbira tal-Unjoni Ewropea. Għandhom frazzjoni żgħira wisq tas-suq, frazzjoni reġjonali. Mhux sew li r-regoli tal-istat jitħallew ifixklu l-interessi tal-pajjiżi ż-żgħar.’

Dr. Sant tkellem dwar id-diffikultajiet li joħolqu ħafna regolamenti li jispiċċaw iħarbtu t-tmexxija tan-negozji u anki lill-gvernijiet. ‘Irridu nkunu ċari. Ir-regoli huma importanti imma ħafna regolamenti jistgħu joħolqu problemi ta’ burokrazija, ta’ proċeduri, ta’ emendi u jistgħu joħolqu wisq investigazzjonijiet. Dan ixekkel in-negozju u l-ħolqien tal-impjiegi.

.

Segwi d-diskors ta’ Dr Sant fuq din il-link :

https://www.youtube.com/watch?v=GfoZ-mzfmI0