IL-ĠERMANJA SE TONFOQ AKTAR GĦAR-REFUĠJATI

Il-Gvern Ġermaniż ippreżenta abbozz tal-baġit għall-2017, li jbassar żjieda fin-nefqa li tirrifletti ż-żjieda fid-dħul. Peress li fl-2017 se ssir l-elezzjoni fil-Ġermanja, l-abbozz tal-baġit jissodisfa t-tliet partiti tal-Gvern ta’ koalizzjoni tal-Ġermanja – il-Partit Demokratiku Kristjan (CDU), il-Partit Soċjali Kristjan tal-Bavarja (CSU) u l-Partit Soċjal Demokratiku (SPD).

Dawn kuntenti biż-żjieda fl-infiq relatata mas-sigurta`, kif ukoll biż-żjieda fl-investiment (€33.7 biljun) u biż-żjieda fil-pensjonijiet (bejn 4% u 6%). Is-somma ta’ €10 biljuni se tintuża għall-integrazzjoni tal-miljun refuġjat li laqgħet il-Ġermanja.

Bejn l-2016 u l-2020, in-nefqa fl-ispiża pubblika Ġermaniża mistennija tiżdied gradwalment minn €316.9 biljun fl-2016 għal €347.8 biljun fl-2020.

Skont it-tbassir tal-Kummissjoni Ewropea, il-Ġermanja se jkollha bilanċ favorevoli ta’ 0.1% tal-PGD f’din is-sena (komparat ma’ 0.5% fl-2015). It-tkabbir se jkun ta’ 1.8% tal-PGD fl-2016. Il-qgħad se jkun ta’ 4.9%.