MINISTRU TAL-FINANZI GĦAŻ-ŻONA EWRO?

Il-Gvernatur tal-Bank Ċentrali Franċiż Francios Villeroy de Galhau qal li se jżid l-impenn tiegħu biex jinħoloq Ministru tal-Finanzi għaż-żona ewro biex jikkoordina r-riformi strutturali fil-pajjiżi taż-żona ewro. De Galhau qal li n-nuqqas ta’ koordinament fil-politika ekonomika qed tiswa liż-żona ewro 2% tal-Prodott Gross Domestiku.

Ir-responsabbiltajiet tal-Ministru tal-Finanzi taż-żona ewro jkunu jinkludu l-ħolqien ta’ strateġija kollettiva għal din iż-żona, l-implimentazzjoni tagħha fl-istati li jużaw il-munita waħda, l-indirizz tal-kriżijiet u l-awtorita` li jmexxi fond monetarju apposta li aktar ’il quddiem iservi ta’ baġit għall-pajjiżi kollha taż-żona.

De Galhau tkellem dwar il-ħolqien ta’ Ministru tal-Finanzi għaż-żona ewro f’artiklu fil-gazzetta Germaniża Süddeutsche Zeitung  flimkien mal-Gvernatur tal-Bank Ċentrali Ġermaniż Bundesbank Jens Weidmann. Weidmann irtira kollox wara li qal lil gazzetta Germaniża oħra li dan il-pjan ma jistax jirnexxi.

Il-Parlament Ewropew ivvota favur proposta li l-profitti annwali tal-Bank Ċentrali Ewropew, li din is-sena laħqu il-biljun ewro, ma jibqgħux jitqassmu lill-istati membri, inkluż lil Malta. Il-proposta hi li dawn jibdew jinżammu bħala parti minn fond ċentrali taż-żona ewro li jkun mmexxi b’mod ċentralizzat minn Ministru tal-Finanzi għaż-żona tal-ewro kollha. Il-MPE Malti Alfred Sant  ivvota kontra l-proposta. Huwa qal li mhux fl-interess ta’ Malta li noħorġu flejjes biex ngħinu fit-twaqqif ta’ istituzzjoni ċentrali ġdida għaż-żona ewro li żgur tħallilna anqas spazju fejn nieħdu d-deċiżjonijiet għalina nfusna.