L-Olanda vvotat kontra l-ftehim bejn l-Unjoni Ewropea u l-Ukraina f’referendum fejn 61% tal-elettorat kienu kontra u 38% ivvotaw favur il-ftehim. Ħarġu jivvotaw 32% tal-elettorat, ftit aktar minn 30% meħtieġa biex ir-riżultat ikun aċċettabbli mill-Parlament Olandiż. Dan ir-riżultat qed jitqies bħala daqqa oħra lill-Unjoni Ewropea waqt li qed taffaċċja l-kriżi tal-immigrazzjoni, iżjed theddid ta’ attakki terroristiċi u ekonomija fraġli. Is-sentiment kontra l-UE qed jiżdied, inkluż fl-Olanda li tappoġġja l-integrazzjoni Ewropea.
L-Olanda vvotat biex tappoġġja jew tiċħad il-ftehim tal-Unjoni Ewropea mal-Ukraina. Vot favur kien tfisser aktar relazzjonijiet magħquda u ekonomiċi ma’ dan il-pajjiż ex-sovjetiku. Il-ftehim ġie ratifikat diġa` fis-27 stat membru l-oħra. Ir-referendum ma jorbotx, iżda uffiċċjali tal-UE jibżgħu li ċaħda mill-votanti Olandiżi jfisser rebħa għar-Russja. L-Olanda kienet l-uniku pajjiż mit-28 stat membru tal-UE li sejħet referendum fuq l-Ukraina.
Il-ftehim, applikat minn Brussell mill-2014, ineħħi t-tariffi tal-esportazzjoni bejn l-Ukraina u l-UE u jipprovdi appoġġ lil ekonomija Ukrena. L-ekonomija Ukrena għaddejja minn perijodu diffiċli hekk kif il-kummerċ mar-Russja naqas ħafna. Dan kollu seħħ waqt il-kriżi politika fl-Ukraina fl-2014 li wasslet għall-vjolenza u t-tneħħija tal-President Viktor Yanukovych.
Il-President tal-Kummissjoni Jean-Claude Juncker diġa` wissa li, “Vot le jħalli l-problemi fl-Ewropa għax inaqqas l-istabilita`”.
Dan il-vot ġie f’mument fejn l-ewroxettiċiżmu tul l-Ewropa qed jikber hekk kif din qed taffaċċja rekord ta’ immigranti, żieda fit-terroriżmu u ekonomija fraġli. Vot le se jaħdem għal vantaġġ tal-ewroxettiċi, speċjalment fir-Renju Unit hekk kif din qiegħda fil-kampanja tar-referendum fuq is-sħubija tagħha fl-Ewropa.
Ir-referendum Olandiż kien l-ewwel wieħed taħt liġi ġdida tal-pajjiż fejn iċ-ċittadini huma msejħa jivvotaw fuq ċertu leġiżlazzjonijiet u trattati li diġa` għaddew mill-Parlament. Dawn it-tip ta’ referenda ma jorbtux. Bdew isiru wara li attivisti ewroxettiċi għamlu petizzjoni ‘online’ u ġabru l-firem bl-argument li l-elettorat jeħtieġ aktar influwenza fid-deċiżjonijiet tal-UE.
Il-Prim Ministru Olandiż Mark Rutte kien diġa` qal li jirrispetta d-deċiżjoni tar-referendum. Bħalissa l-Olanda għandha l-Presidenza tal-Kunsill. Rutte kien fost dawk li appoġġja dan il-ftehim mal-Ukraina bl-argument li jiżdied il-kummerċ u jgħin biex l-ekonomija u d-demokrazija fl-Ukraina jkunu stabbilizzati.
Fl-2005, l-Olanda qanqlet kriżi oħra fl-UE hekk kif ħafna mill-votanti ma aċċettawx il-kostituzzjoni l-ġdida tal-UE. Din kellha tiġi emendata iżda ma reġgħetx kienet miftuħa għall-vot. Minn dak inhar ’l hawn, l-entużjażmu għall-UE bired aktar fl-Olanda.
Mhux ċar x’se jiġri jekk l-Olanda ma tirratifikax il-ftehim mal-Ukraina. Tibdil fil-ftehim jeħtieġ negozjati ġodda u ratifikazzjoni mill-ġdid mit-28 kap ta’ stat tal-UE. Uffiċċjali tal-UE qed jgħidu li x’aktarx l-aħjar soluzzjoni hija li l-ftehim jibqa’ fis-seħħ b’mod temporanju, għalkemm b’dan il-mod aktar gvernijiet jistgħu joħorġu minn dan il-ftehim.
Vot le jista’ jfisser li l-Ukreni ma jiksbux aċċess biex jidħlu fil-UE mingħajr visa. Din it-talba, li ġiet approvata mill-Kummissjoni Ewropea għad trid tiġi approvata mill-Istati Membri kollha, inkluż l-Olanda.
JIŻDIED IS-SENTIMENT KONTRA L-UE
Read More
MINISTRU TAL-FINANZI GĦAŻ-ŻONA EWRO?
Read More
JIŻDIEDU L-‘ĠELLIEDA BARRANIN’ FL-EWROPA
Read More
ALFRED SANT JISTAQSI LIEMA PAJJIŻI TAL-UE SE JIEĦDU IMMIGRANTI SIRJANI
Read More
JIŻDIED ID-DEFIĊIT PUBBLIKU TA’ SPANJA
Read More
IL-ĠERMANJA SE TONFOQ AKTAR GĦAR-REFUĠJATI
Read More
L-UNJONI EWROPEA TIMPONI SANZJONIJIET KONTRA L-MEXXEJJA LIBJANI
Read More
JONQOS IS-SENTIMENT POŻITTIV DWAR L-EKONOMIJA
Read More
L-ISVIZZERA B’KUMMERĊ AKBAR MIR-RUSSJA MAL-UE
Read More
L-UE B’DEFIĊIT KUMMERĊJALI MAL-INDJA
Read More
PRINĊEP RUMAN TA’ 52 SENA
Read More
Post a comment