X’INHU INTERGROUP?

Fil-Parlament Ewropew hemm 28 Intergroups. Dawn ġew approvati fil-11 ta’ Diċembru 2014 mill-Konferenza tal-Presidenti. L-Intergroups jistgħu jkunu ffurmati mill-Membri Parlamentari Ewropej u mill-Kumitati Parlamentari. L-Għan huwa li jkun hemm skambju ta’ informazzjoni b’mod informali fuq suġġetti u kwistjonijiet partikolari. Għan ieħor huwa li jkun hemm interazzjoni bejn il-Membri Parlamentari Ewropej u s-soċjeta` ċivili.

L-Intergroups mhumiex entitajiet parlamentari u jistgħu jesprimu opinjonijiet li mhux neċessarjament jaqblu mal-linja tal-Parlament Ewropew. L-Intergroups jitmexxew b’regoli interni.

Grupp ta’ dan it-tip li hu ta’ interess għall-arċipelagu tagħna huwa l-Intergroup tal-Ibħra, Xmajjar, Gżejjer u Żoni mal-Kosta. Dan l-Intergroup għandu 80 Membru Parlamentari Ewropew ġejjin minn 6 gruppi politiċi differenti u 19-il stat membru. 3 mis-6 deputati Ewropej Maltin huma parti minn dan il-grupp – Alfred Sant, Marlene Mizzi u Roberta Metzola.

Xi eżempji oħra ta’ Intergroups huma dawn:

Kontra r-razziżmu u favur id-diversita`; drittijiet tat-tfal; tibdil fil-klima, bijodiversita` u żvilupp sostenibbli; sports; trade unions; industriji kreattivi; aġenda diġitali; diżabilita’; intrapriżi żgħar u medji.