FTEHIM MAL-AWSTRALJA U NEW ZEALAND

Il-Parlament Ewropew qabel li jibdew in-negozjati li jwasslu għal ftehim ta’ kummerċ bejn l-UE u l-Awstralja u New Zealand. Ir-riżoluzzjoni għaddiet b’479 voti favur, 123 kontra u 17-il astenzjoni. Il-ħsieb hu li dan il-ftehim jistimula t-tkabbir u jsaħħaħ ir-relazzjoni tal-UE mar-reġjun tal-Asja u l-Paċifiku.

Il-Parlament Ewropew saħaq li l-ftehim, fost oħrajn, għandu jindirizza l-investiment, il-kummerċ ta’ servizzi u oġġetti, e-commerce, l-enerġija, l-intrapriżi parastatali, il-kompetizzjoni, ir-riċerka teknoloġika u l-ħtiġijiet tal-intrapriżi żgħar u medji.

Il-ftehim għandu jkun pożittiv fit-tmexxija tal-ekonomija globali permezz ta’ konverġenza fl-istandards internazzjonali. Dan mingħajr ma jitnaqqsu l-livelli tas-sigurta` fl-ikel, u l-protezzjoni fuq l-ambjent, fis-settur soċjali u dak tax-xogħol.

Il-Parlament Ewropew jixtieq li waqt in-negozjati l-Kummissjoni tiftaħ kapitlu apposta dwar l-aċċess tas-suq għall-intrapriżi żgħar u medji, kif ukoll kapitlu dwar żvilupp sostenibbli fis-settur tal-ambjent. Minbarra dawn il-kapitli, il-Parlament Ewropew saħaq biex jiddaħħlu perijodi ta’ transizzjoni u anki kwoti fis-setturi tal-agrikoltura u s-sajd biex jitħarsu l-interessi tal-produtturi Ewropej.

Il-Parlament Ewropew irid li l-ftehim isir b’mod trasparenti.