L-EWROPA MA TISTAX TFARFAR IL-PROBLEMA TAL-IMMIGRAZZJONI FUQ L-ISTATI Ż-ŻGĦAR TAS-SUD

L-Ewropa ma tistax tfarfar il-problema tal-immigrazzjoni fuq l-istati żgħar tas-sud. Dan qalu Alfred Sant fuq l-istazzjon televiżiv Grieg ALPHA,  li ddeskriva  l-immigrazzjoni bħala problema Ewropea. “Irridu nimbuttaw lill-politiċi l-kbar biex joħorġu b’soluzzjoni Ewropea li tista’ tkun implimentata minn kullħadd. Bħalissa l-Greċja qiegħda fuq quddiem imma Malta u l-Italja jistgħu jispiċċaw fuq quddiem f’ħakka t’għajn, minħabba l-Libja, u l-Ewropa xorta ma tiħux azzjoni. L-Ewropa trid timbotta lil politiċi l-kbar biex iwettqu dak li hu tajjeb u dak li jeħtieġ isir. Ma jistax ikollna lil Ġermanja timbotta naħa, Franza timbotta naħa oħra, l-Italja ’l barra mix-xena, biex imbagħad pajjiżi żgħar bħal Greċja, Malta u l-Bulgarija jerfgħu l-piżijiet.” emfasizza Dr Sant.

L-Ewroparlamentari Malti qal li ma hemmx rieda tajba fl-Ewropa fuq din il-kwistjoni waqt li n-nies qed ikunu mwarrba mit-Turkija, mill-Greċja u mill-Balkani. “Il-punt kollu huwa dan: teżisti soluzzjoni Ewropea għal dan kollu? Biex ikun hemm soluzzjoni Ewropea, irid ikun hemm rieda tajba bejn in-Nord u s-Sud. Ma naħsibx li hemm daqstant rieda tajba. Din hija problema politika. Jien ġej mill-gżira Mediterranja ta’ Malta. Allura nifhem il-problemi li qed jaffaċċjaw il-gżejjer Griegi bl-influss enormi tal-immigranti. In-nies għandhom bżonn l-għajnuna u għandhom bżonn jiġu organizzati. Ma tistax tagħmel dan kollu mil-lejl għan-nhar. Teħtieġ iż-żmien u r-riżorsi u r-riżorsi ma jistgħux jitwaqqfu hekk, kif ġie ġie, fuq gżira żgħira.”

Dr Sant qal li l-Greċja u t-Turkija, alleati fin-NATO, għandhom interessi kumplimentari f’din il-kwistjoni. “Is-sitwazzjoni sejra mill-ħażin għall-agħar għax ma hemmx pjan reali, m’hemmx ftehim reali fl-UE msejjes fuq rieda tajba. Il-Ġermaniżi jridu xi ħaġa, l-Awstrijaċi jridu xi ħaġa, it-Taljani jridu xi ħaġa oħra – kullħadd irid xi ħaġa differenti. Kullħadd irid lir-refuġjati barra mis-sistema tiegħu. Jekk il-problema hija ta’ pajjiż ieħor, mela m’hemmx problema.”

Dr Sant semma’ kif seba’ snin ilu ħadd ma sema’ lil Malta meta refuġjati mill-Afrika ta’ Fuq bdew jieqfu fuq Malta u Lampedusa. “Din hija l-problema reali tal-Ewropa; in-nies ma jridux isolvu l-problema jekk il-problema qiegħda għand il-ġar, pajjiżi oħra ma jinteressahomx mill-problema. Il-pajjiżi Ewropej jinteressahom biss meta l-problema tkun tagħhom….Jeħtieġ li  jinħarġu parametri, fuq bażi Ewropea, ta’ kemm l-Ewropa tkun trid li taċċetta immigranti. Kif  se tkun organizzatal-immigrazzjoni legali? Kif se tkun organizzata s-sistema għar-refuġjati? Meta se ssir ir-riforma tat-Tieni Trattat ta’ Dublin ?” staqsa Dr. Sant.

Il-Kap tad-delegazzjoni Laburista tal-S&D qal li l-ftehim tad-Dublin 2 jfisser li teoretikament meta n-nies jaslu bħala refuġjati fil-Greċja, jridu jibqgħu l-Greċja. Jekk jaslu Malta, jridu jibqgħu Malta. “Din ma tagħmilx sens! Imma xorta, għadha ma nbidlitx. Jekk il-Ġermanja trid li r-refuġjati jaslu f’pajjiżha, u se jaslu f’pajjiżha, x’parametri hemm dwar numri u żmien? Huwa hawn fejn l-Ewropa qed tfalli. Irridu nippjanaw fuq bażi Ewropea, kemm se naċċettaw immigranti, liema se jkunu r-riżorsi, fejn se jitqiegħdu. Ma tistax tweħħel fil-Greċja għax il-Greċja ma tistax tlaħħaq ma’ mijiet ta’ eluf ta’ immigranti. Kif tista’ l-Greċja tlaħħaq ma’ mijiet ta’ immigranti kulljum? Ma tistax! U din li qed inwaħħlu fil-Greċja hija ħmerija oħra biex ngħattu l-problema reali – in-nuqqas ta’ ppjanar – sejjaħlu solidarjeta` jekk trid – pjan li jkun aċċettat fuq bażi nazzjonali u implimentat fuq bażi nazzjonali.” qal Dr Sant lill-istazzjoni televiżiv Grieg.

Tista’ ssegwi dak li qal Dr Sant fuq din il-link:
https://www.youtube.com/watch?v=KSY5TKoWsLY