JEĦTIEĠ EVALWAZZJONI TAL-UNJONI EKONOMIKA U MONETARJA

L-Ewroparlamentari Malti Alfred Sant qal lill-Parlament Ewropew li jeħtieġ evalwazzjoni tal-Unjoni Ekonomika u Monetarja (EMU). Dr. Sant qal li lil hinn mill-konsolidament ta’ strutturi maniġerjali eżistenti, hemm bżonn nevalwaw kif żviluppat l-Unjoni Ekonomika u Monetarja sa issa. Dr. Sant kien fost għadd ta’ membri parlamentari ewropej li kkummentaw dwar il-proposti biex titlesta l-Unjoni Ekonomika Ewropea.

Dr Sant staqsa wasalx il-waqt li nirriflettu fil-fond dwar il-forma tal-Unjoni Ekonomika u Monetarja. ‘Jeħtieġ li naħsbu f’affarijiet ġodda biex naġġornaw dak li hemm imma mingħajr ma ninsew dak li ksibna? Filwaqt li nuru dieqa dwar in-nuqqas ta’ kompetittivita’, jista’ jkun li r-regoli tat-Tkabbir u Stabilita` stess qed joħonqu l-kompetittivita`?’ Għaliex permezz ta’ ‘aktar Ewropa’ ma rnexxilniex insiru aktar kompetittivi u nakkwistaw aktar investiment? It-twaqqif ta’ kunsilli burokratiċi li jippridkaw dwar il-kompetittivita` kienet tweġiba tajba għal dan kollu? Hemm bżonn nirrevedu r-regoli ta’ Stabilita` u Tkabbir? Lil hinn minn strutturi maniġerjali li jqarrbuna aktar, jeħtieġ li ssir evalwazzjoni fil-fond ta’ kif l-Unjoni Ekonomika u Monetarja żviluppat u kibret sa issa.’ enfasizza Dr Sant.

Dr Sant qal li l-istrutturi li hemm x’aktarx huma biżżejjed biex jipproteġu l-ewro jekk terġa’ sseħħ kriżi simili ta’ dik tal-2008. ‘Imma huma biżżejjed għal tipi ġodda ta’ kriżijiet li jistgħu jinqalgħu? Pereżempju, id-diffikultajiet tal-lum qed jinħolqu mill-istaġnar u l-fraġilita` ekonomika; nuqqas ta’ ħolqien ta’ xogħol u kompetittivita`; investiment pubbliku u privat limitat ħafna. Dawn il-problemi ma tantx ġew solvuti b’suċċess.’

Il-President tal-Eurogroup Jeroen Dijsselbloem enfasizza li t-tisħiħ tal-EMU jinkiseb b’aktar progress fuq it-tnaqqis u l-qsim tar-riskji finanzjarji. Il-President tal-Kummissjoni Ewropea Jean-Claude Juncker staqsa ‘x’jista jkun hemm aktar urġenti milli nipproteġu t-tfaddil taċ-ċittadini tagħna u nsaħħu l-fiduċja fis-sistema bankarja tagħna?’ MEPs oħra iddiskutew il-prijoritajiet ekonomiċi u soċjali tal-UE għas-sena 2016 kif imfassla fis-Survey tat-tkabbir annwali, u r-rakkomandazzjonijiet speċifiċi għal kull pajjiż membru taż-żona ewro.

Segwi d-diskors ta’ Dr Sant fuq din il-link:

https://www.youtube.com/watch?v=yIe8YF9Fyvk